prosody | miscellaneous |
Si tot noncas res es grazitz Tant cum sol chans ni solatz gais, Non er q'ieu, jauzens, no m'eslais D'un vers far, don sui enquisitz! Car cel q'a bon' escienssa Deu far so c'a Pretz agenssa! Non deu celar son saber, ni cubrir Lai on cove a mostrar ni a dir, Q'en totz luocs val adrecha chaptenenssa. De re non es hom tan sazitz, Ni a tant leu jois ni esmais, Ni non port om tant greus eschais Cum d'Amor, q'a amans conquitz! C'Amors a poder que venssa, E, qand ieu n'ai sovinenssa, Adoncs cossir qe mieills mi degr' aucir Q'eu anc sofris qe m'en pogues partir, Can vi l'amor e la gran benvolenssa. E no.is taing q'estei plus marritz Ni vir mon fin cor en biais, Pero trop mi carguet greu fais La bella fals' enganairitz, Que totz fui mortz en parvensa, Mas er n'ai trobat guirensa Tal que m'a gent desliurat de morir, Q'es la genser q'om puesc el mon chausir, Et er reman fazen sa penedenssa. Don fui cortesamen garitz, Q'enqer n'ai en la bocha.l bais E la doussa sabor e.l jais Don fui gent baisan acuillitz Per lieis, q'anc non fetz faillenssa! E, pos tant gen m'o comenssa, Anc la doussors del bais no.is poc partir De ma bocha! ja no.m deu mais faillir, Ni far ni dir nuilla desavinenssa E car anc n'estei jorn faiditz De lieis vezer, on beutatz nais, Ni que.l fols sens al non s'atrais, Er ill sia.m perbost e guitz Ar vau mon greu tort, ses tenssa, Adrechurar en Proenssa -- E si anc ren qe fezes a grazir Agui de lieis, de lai l'ai, ses faillir, E d'En Agout e de sa conoissenssa. Mon vers volrai qe si' auzitz Per mon Bel Thesaur, part Clavais, Qu'il es de pretz clartatz e rais! Et an, qand er de lui partitz, A 'N Ric de Joi a presenssa, Dir q' En Sobeirans d'Argenssa E ma dompna m'a fait de lai venir! Car, si per els no fos, er, ses faillir, For' ieu Lombartz de sen e de valenssa |