home page ?


Gauselms Faiditz, de dos amics corals.
Al vostre sen me digatz so qu'en es,
Quant a l'un d'els ve de sa domna bes,
Et a l'autre dans e destrics e mals,
Si que neguns non a poder que.s vir --
Qual se deu plus esforsar de servir
Sidonz per so, en dreg d'amor jujatz,
E pois cellui que.us volretz razonatz.

--N'Aimerics, ges non es plaitz comunals,
C'aisel cui ven d'amor en totas res
Dans e destrics dei' esser tan cortes
Enves sidonz de servizis leials,
Com sel cui son complit tuit siei desir!
Non es razos, ni hom non o deu dir,
Que s'esfors tant hom desaventuratz
Com fis amics qu'es leialmen amatz.

--Gauselms Faiditz, entendeires venals
Degra penre si com vos avetz pres--
C'aitals amics non serf sa domna ges
Si ben conosc que.l servirs sia sals!
Non es esfortz, ni fai tan a grazir,
Qui d'un ben saup autre be far issir!
Mas cui de mal pot far ben, so sapchatz,
Ab gen servir deu esser dobles gratz.

--N'Aimerics, gen razonatz so qu'es fals,
E.l razonars non es mas nescies. . .
Com auzatz dir que.l drutz cui val merces
Non deg esser de servir plus cabals
Que.l desamatz que.s deuria aucir
Fol' er dompna si.us fai de se jauzir,
Si ses ben fag valetz e.us esforsatz,
E si.us fai ben, que ja ren non vaillatz

--Gauselms, ben sai que vos etz totz aitals--
Cujatz quez ieu n'aja de vos apres
E doncs no.s deu esforsar de manes
Lo paubres, tant c'al manen si' egals
Pero mais vol lo malautes garir
C'uns autres sans al malaveg fugir,
E.s deuria sel qu'es pauc enansatz
Esforsar plus que sel qu'es plus prezatz

--N'Aimerics, trop es affars desegals,
Que vos digatz que drutz on pretz s'esmes
Non deia miels gardar so qu'a conques
Ab proesas et ab fatz naturals,
Qu'aicel que ren non a, mas lo conssir!
Non a que grat, anz se fai escarnir,
E sos servirs es perda e foudatz,
Pois a sidonz ren que fassa non platz.

--Gaucelms, lo Coms de Fois, que.s fai grazir,
Nos sabra ben jujar e devezir,
Qu'estiers per vos, si doncs no m'en forsatz,
Non posc esser per dreg apoderatz.

--N'Aimerics, ben sabra lo miels chauzir
Lo valenz Coms, e.l ver jujamen dir,
C'aissel sap miels lo dreitz d'amor assatz
Qu'en es soven alegres et iratz