Main PageTroubadours' ListingMore Works by Gaucelm Faidit

The prosody guide is available as a book. Click here for details.

Al semblan del rei Thyes,
Qan l'ac vencut l'emperaire,
E.il fetz tirar, qan l'ac pres,
Sa carret' e son arnes,
Don el chantav' al maltraire,
Vezen la roda virar,
E.l ser, plorav' al manjar,
Chant on plus ai malananssa,
Qan cossir q'en alegranssa
Mi pot mon maltraich tornar,
E plor qan vei joi ni be
Als autres, e mi sove
Q'ieu n'aic pro, ar non ai re.

Q'en aital trebailla.m te
Pres Amors, en greu balanssa,
E no sai ren dir per que,
Mas car aten sa merce,
Vencutz ses desesperanssa,
E car no.m recre d'amar --
Que d'als no.m pot encolpar,
Tant soi fis, leials amaire
De vos, cui non aus retraire
Ni descobrir mon penssar,
Pros dompn' ab gen cors cortes,
Tant tem lo pretz q'en vos es
E las grans valors e.ls bes

Pero no.m desesper jes,
Ni m'es semblans ni vejaire
Q'en vos non sia merces!
Qe.l vostre cors ben apres,
Humil, franc e de bon aire
Vei, e.l ric pretz valen car,
E.l gen ris e.l dous parlar,
Joios ab gaia semblanssa!
E car non trobatz eganssa
De beutat el mon, ni par,
Aisso.m tira si lo fre
E.m tol l'ardit e.m rete
Q'ieu no.us aus prejar de re

Qar maintas sazos m'ave
C'ab tota fait' acordanssa,
Dompna, .us cuig prejar de me,
E puois, qan mos cors vos ve,
M'espert, e non ai membranssa
Mas sol de vos esgardar,
E no.us sai ni.us aus prejar,
Ni m'amor no.us puosc estraire --
Doncs, gran merce pogratz faire
Si.m dessetz ses demandar,
Que non es tant pauca res
Qe del vostre don agues
Q'ieu a gran no la.m tengues

Per q'enans qe.l bruitz vengues,
Ni fals lauzengiers trichaire
L'amor q'ie.us ai conogues,
Fora gen, s'a vos plagues,
De conoisser mon afaire
Puois ieu no.l vos aus mostrar,
C'un honrat do.m pogratz dar
Si, ses tota malestanssa,
Sofrissetz c'a vostr' onranssa
Fosson mais tuich miei chantar,
E.l plus lais, que be.is cove,
Mas d'aisso non cuich ni cre
Que so qu'enqier me malme.

E pois de vos no.m recre
Ni de la vostra fianssa,
Don e.us autrei per jasse
Mos chans e ma leial fe!
Si vostra valors m'enanssa,
Honors vos er, ses doptar!
Vos sabetz co.is tanh a far,
Q'ieu no.n dic plus, pauc ni gaire,
Mas tant c'umils mercejaire
Vos sui ab fin cor e clar!
E s'aesmes ni saubes
C'auses mais dir ni degues,
Del plus mi for' entremes.

De Ventadorn vuoill retraire
Qe la dompna non a par
De beutatz ab complitz bes,
E si'N Maracdes saubes
So q'ieu sai, be.il fora pres