Main PageTroubadours' ListingMore Works by Gaucelm Faidit

The prosody guide is available as a book. Click here for details.

Coras qe.m des benananssa,
Amors, ni q'en fos jauzire,
Ara.m ten sa trencan lanssa
Al cor, de qe.m vol aucire --
Mas tant m'auci ab bel martire,
Q'ieu.l perdon ma mort franchamen!
Bella dompn' ab gai cors plazen,
Per vos plaing e per vos sospire,
E ren mas ma mort non aten!
Pero si cum vos platz m'es gen

Mout fui de foll' acordanssa
E plus fui de fol cossire,
Lo jorn q'en aital balanssa
Volgui mon fin cor assire!
E puois fui de pejor albire,
Car anc me venc en pessamen
Q'ie.us auzes dir ni far parven,
Dompna, so q'ieu degr' escondire!
Mas er, qan non puosc, m'en repen,
Que tot so ai faich follamen.

Grand ardit e grand doptanssa
Agui, qan vos anei dire
Mon cor ab humil semblanssa,
Don fui plorans descobrire!
Per merce.us clam q'en dan no.m vire
S'ieu ai faich vas vos faillimen
Per outracujat ardimen!
E no moira car vos desire:
Vostr' om sui e vostr' om mi ren!
Aissi cum vos voillatz, o pren.

Si be.m muor, mal ni pesanssa
Non puosc aver, qan remire
La vostra bella cundanssa
E.l doutz esgar e.l gen rire,
E totz los bes q'om pot eslire:
Beutat e gaiez' e joven,
Honor e pretz, valor e sen!
Res mas merces no.y es a dire,
Dompna, c'ab merce solamen,
I serian complidamen

Car cel Andrieus, c'om romanssa,
Non trais anc tant greu martire
Per la reina de Franssa
Cum ieu per vos cui desire!
Mas tant aut etz, per q'ieu m'albire,
Que ja non aurai jauzimen
S'Amors vas mi no lo dissen!
E si merces s'i vol assire,
Anc paire, ni autre paren,
Non amet vos tant finamen

Pero d'un pauc d'esperansa
-- sol vostre cors no.s n'azire --
Ai, en dreitura, fizansa,
Que.m fezes, don soi grazire!
Prec vos, com lial sufrire
Dona, que n'ajatz chauzimen,
Qu'ieu no.us deman autre coven,
Mas que.us sia en cantan servire,
Az ops de vostre pretz valen,
Que ren als no.i quier ni enten.

Donx, bela dona, membranssa
N'ajatz, qu'ieu no.us soi mentire,
E si vostre pretz s'enansa,
Per Dieu, quar vos am, no.us tire
No.s pot mos maltraitz escrire
Tot sia el vostr' esgardamen,
Que mi e mon chant vos prezen,
E vostra chanso, ses desdire,
Lans qu'an ves mon Plus Avinen,
De part vos per acoindamen.

Na Maria, tan vei plazen
Tot so q'a vos platz far e dire,
Per qe'us son tuich obedien
Li cortes e.il bon e.il valen