Main PageTroubadours' ListingMore Works by Gaucelm Faidit

The prosody guide is available as a book. Click here for details.

Can vei reverdir les jardis
Et oi les oizelets chanter,
Et nos est tant dous li marchis,
Me renovelent mei pensier!
Qu'ores me sovient d'un cler vis
Que je ne puis mie oblier . . .
Qu'en tel damey pozai mon cuer
Don muer et viv' et viv' et muer.

La bele de cui sui amis
M'a fait passer d'outre la mer,
Et desaisine mon pais!
Poruec tant loing ne.m' fait aler
Que s'amor n'aie sa requis!
Por qu'a lui m'est os retorner . . .
Qu'en tel damey pozai mon cuer
Don muer et viv' et viv' et muer.

Las je sai don sui en error,
Qu'elle aime plus de moi autrui
Et sai que ja n'aura un jor
Merci de moi, qui mal a fui,
S'ele n'oblie sa richor,
La quel ele est et quel je sui . . .
Qu'en tel damey pozai mon cuer
Don muer et viv' et viv' et muer

Ne puis muer que je retor
A li qui m'auci et destrui,
Que.l' cuer m'a blesse d'un' amor
Qui ver li m'amen' et m'adui!
Mais me prein dotanse et paor
Que, quan me verra, je l'enui . . .
Qu'en tel damey pozai mon cuer
Don muer et viv' et viv' et muer.

Je sais que cel destreit m'auci
Et ja me mene en povrete,
Et sai que ja n'aura merci
Si sa richesse et sa beaute
Et son pris ne met en obli,
Mais cil ne l'a mie oblie . . .
Qu'en tel damey pozai mon cuer
Don muer et viv' et viv' et muer.

Bone dame, por Dieu vos pri
O douce franche humilite,
Que regardez ver vostre ami,
Si ferez franchesse et bonte!
Car ja mais Dieu n'aura merci
De rien si n'a d'autrui pite . . .
Qu'en tel damey pozai mon cuer
Don muer et viv' et viv' et muer.