home page ?


Ara nos sia guitz
Lo vers Dieus Jhesus Cristz,
Car de franca gen gaia
Soi per lui partitz,
On ai estat noiritz
Et onratz e servitz --
Per so.il prec no.il desplaia
S'ieu m'en part marritz --
Ai gentils Lemozis,
El vostre dous pais
Lais de bella paria,
Seignors e vezis
E dompnas ab pretz fis,
Pros, de gran cortesia,
Don planc e languis
E sospir nuoig e dia

E cals que sia.l critz
De remaner auzitz,
Ja nuills bes qe.m n'eschaia
Ni rics luocs aizitz
No.m tenra, ni conquistz,
S'avia.ls votz complitz
C'apres calenda maia
No sia garnitz
Del torn, si Dieus m'aizis,
E, s'a lui platz, m'afis
En leial romavia!
Lo tot li grazis
Pero, mas joins, aclis,
Prec vas sa seignoria
Qe.ls portz e.ls chamis
Nos adreis vas Suria.

Honratz es, e grazitz,
Cui Dieu non es faillitz,
Car Dieus vol et essaia
Los pros e.ls arditz!
Et aquels a chauzitz,
E laissa los aunitz
E l'avol gen savaia
Per cui es trahitz.
Ai, chaitiu, mal assis.
Vos eis vos etz aucis
C'avers e manentia
Vos tol paradis!
Q'avar etz e ressis
Tan c'us far non poiria
Q'a Dieu abellis,
Per qe Dieus vos desfia.

Oimais es Antecristz
Al dan del mon issitz!
Que totz lo bes s'esmaia,
E.l mals es saillitz,
Qe.ls fals rics a sazitz
E pres et endormitz!
E.l pecatz qe.ls esglaia
Los ten morns e tristz!
Qe.l reis cui es Paris
Vol mais, a Sain Daunis
O lai en Normandia,
Conqerr' esterlis
Que tot cant Safadis
A ni ten en baillia,
Don pot esser fis
C'aissi cum deura sia

Er laissem los giquitz
Remazutz, escarnitz!
Et, ab l'obra veraia
De bona razitz,
Sia per nos servitz
Lo vers Sains Esperitz,
Cui pregem que.ns atraia
Ab faitz afortitz
A dan dels Sarrazis,
Si q'en sia conquis
Lo Sains Luocs, e la via
Faita als pelegris,
Que nos tolc Saladis!
Don la Vergena pia,
Cui Dieus benezis,
Nos sia garentia

Bels dous Maracdes fis,
Vos e.ls pros Peitavis
Sal Dieus, e Na Maria
Qu'a bon pretz conquis
E ma domna Elis
Sapcha be, ses bausia
Qu'eu li sui aclis
On qu'eu an ni estia

Ai, dos Maracdes fis
Vos e.ls pros Peitavis
Sal Dieus e benezia,
Car lai son aclis . . .
Et a nos peleris
Lais venir en Suria!
Que.l coms Baudouis
E.l pros Marques i sia.