prosody | miscellaneous |
Del gran golfe de mar E dels enois dels portz, E dels perillos far, Soi, merce Dieu, estortz Don posc dire comdar Qe mainta malanansa I hai suffert, e maint turmen E pos a Dieu platz que torn m'en En Lemozi, ab cor jauzen, Don parti ab pesansa, Lo tornar e l'onransa Li grazisc, pos el m'o cossen. Ben dei Dieu mercejar, Pos vol que, sans e fortz, Puesc' el pais tornar, On val mais uns paucs ortz, Qe d'autra terr' estar Rics ab gran benanansa Qar sol li bel acuillimen, E.il onrat fag e.il dig plazen De nostra domn' e.il prezen D'amorosa coindansa, E la doussa semblansa, Val tot can autra terra ren. Ar hai dreg de chantar, Pos vei joi e deportz, Solatz e domnejar, Qar so es vostr'acortz! E las font e.l riu clar Fan m'al cor alegransa, Prat e vergier, qar tot m'es gen Q'era non dopti mar ni ven, Garbi, maistre ni ponen, Ni ma naus no.m balansa, Ni no.m fai mais doptansa Galea ni corsier corren. Qi, per Dieu gazaignar, Pren d'aitals desconortz, Ni per s'arma salvar, Ben es dregz, non ges tortz! Mas cel qi, per raubar E per mal' acordansa, Vai per mar, on hom tan mal pren Em pauc d'ora, s'aven soven Qe, qan cuj'om pujar, deissen! Si c'ab desesperansa Il laissa tot en lansa L'arm' e lo cors, l'aur e l'argen |