Main PageTroubadours' ListingMore Works by Gaucelm Faidit

The prosody guide is available as a book. Click here for details.

S'om pogues partir son voler
De so don plus a.l cor volon,
Can no.n pot jauzimen vezer,
L'uns dels grans sens fora del mon!
Car, de las grans foudatz que.i son,
Es be la maier, qui s'enten
Segre son dan ad escien,
Car doblamen
Fai faillimen --
Pero greu er fis amics drutz privatz
Si.l bes e.l mals e.l jois e.l dan no.il platz.

Tot aisso mi vengr' a plazer,
Si tot sui el maltraich prion,
S'Amors mi volgues tant valer
Que l'amoros cors deziron
Mi pagues d'un joi jauzion,
Qu'assatz par que for' avinen
Qez agues del ben qui.l mal sen!
Q'ie.n preira cen
Malstraitz sofren,
E fora.m jois e plazers mout onratz,
S'apres cen mals en fos d'un joi pagatz.

Mas ieu lo pert si.l ben esper,
Cum cel q'al jogar se confon,
Qe jog' e non pot joc aver,
E non sent fam ni set ni son --
Atressi m'es pojat el fron
Et intrat el cor, follamen,
Que, qan plus pert, mais i aten
Cobrar soven,
Tant ai fol sen
E l'atendres non es res mas foudatz,
Car a mon dan sui trop enamoratz.

Tuich trop son mal, q'ieu.l sai en ver,
Qe.l aut pojars, don chascus gron,
Q'ieu fezi, m'a faich bas chazer --
E pero pojei tant amon
Que penre cuidei l'aurion,
Qu'om non pot penre ab ren viven
De tant fort manieira.is defen!
Pero temen,
Et humilmen,
O comensei com hom d'Amor forssatz,
Don non m'er mal, si n'er' a dreig jutjatz

E car res no.m pot pro tener
Ab lieis don muor et art e fon,
Un sen fauc, qu'ab forsat poder
Fug de lieis vezer e.m rescon --
Mas mos sens no vei que m'aon,
Q'ieu muor qand no vei son cors gen
E qand lo vei muor eissamen,
Qe nuill parven
No.m fai plazen!
Anz qand l'esgart esgard' ad autre latz,
Que no m'acuoill ni.m vol aver solatz.

Vas mi donz sui de franc saber,
Plus humils d'un frair de Granmon,
Et ill m'es d'orgoillos parer
Si que, qan la prec, no.m respon --
Un aventur' ai, no sai d'on,
Q'anc re non amei coralmen
C'orguoill no.m mostres mantenen,
C'aital tormen
Brau e cozen
Mi mostr' Amors, a cui me sui donatz!
Aquest m'es totz lo guizerdons e.l gratz

Si be.m sui en greu pessamen,
Cum cel qe merce non aten,
Chanssos, vai t'en
Tost e corren
Dir mon Thesaur, de cui es Monferratz,
Q'ieu.l qier perdon car lai non sui tornatz.

Bels Diamans, be.m plai vostra beutatz,
E ben lo pretz on chascun jorn pojatz.