| |
|||
| prosody | miscellaneous |
Nulha res a chantar no.m falh, Per que deu pro mos chans valer! Qu'er ai be razon e lezer E loc e sazo de que chan, E mais d'aitan Me creis ma benanansa Qu'en bona cud'ai mon esper, Que.m tol temer E.m fai joi jauzir e solatz, E vei assatz C'obs m'es que mos chans se melhur, Pos en ma senha crit Segur. Car non es drechs que chans nualh, Can de joi mou ni de plazer! Car si s'encontron d'un voler Dui fin amic e d'un talan Que vas engan No penda la balansa, Chascus se deu contratener C'a so poder No.s volva ni.s vir al seu latz C'amics amatz S'a cor que menta ni.s perjur, El'es on bran a mal aur. Qu'eu c'ai pres en man loc trebalh, De man mol lech man dur jazer, Lais ab alques de bo saber Ma rancur'e.m vauc adesman Que contral dan Clau ab bon'esperansa Tal fors'on poscha remaner, E si.m dis ver Mos senher, pro sui be fermatz: Ges no.m men'atz, Mas, de cui que.m clam ni.m rancur, Ab leis me remanh e m'atur. E merces, quez ab leis no valh Res fors Deus no.m pot pro tener De peiurar ni de chazer E, pos eu ren als no.lh deman Mas qu'en cudan M'alarc ma benestansa, Membre.lh com m'afizet un ser Al seu maner So don me sui pois conortatz E, s'aissi.lh platz, Per l'amistat que.lh tenh li jur Que de ben-amar no peiur E s'eu ges per s'amor trassalh, Que.l trop no.n poscha sostener, Ni.lh m'enquer cal que no-dever, Franha.l fol orgolh mercean! Que benestan L'er, si.m creis ni m'enansa. Qu'eu ai be vezut eschazer C'a l'estober Val vil tengutz e mesprezatz! Qu'estanhs folhatz Es mes soven sotz bon azur Per que melhs tenh'e que mais dur. E si.m mes en son assenalh E de so trach no.m posc mover, No.m lais de l'altrui colp doler, Mas fera.m ab un bel semblan Qu'eu no.lh coman Fach, don ai afiansa D'altr'amistat. mas del vezer Can n'ac lezer L'adrechs cors e ben ensenhatz, No.m fo privatz, Ans, can poc far de clar escur, Me fetz barrera d'un prim mur. E fora m'en desconortatz, Tristz e forsatz Sobre totz! mas tan bon aur N'agui, per qu'eu sofer e dur. E mos Folha te per tafur Celui que no.n cre bon aur. |