Main PageTroubadours' ListingMore Works by Giraut de Bornelh

The prosody guide is available as a book. Click here for details.

Si.l cor no.m ministr'a drech
E mal so grat no l'afranh
En un chantaret sotil,
No m'es vis qu'era s'afranha,
Si no m'esfors'atz,
En aitals motz peceiatz.
Ja fo que.m n'entremetia
Plus qu'era no fatz,
Car melhs me lezia,
C'a penas om conoissia
Mos leugers dichs enversatz
Sotils e menutz soudatz.

E si.l chantar lais per frech,
Don manta gens se complanh,
Ni n'ai mo conort plus vil,
Ben estara que.m sofranha,
Can venra l'estatz,
Jois e deportz e solatz
E pos d'avol companhia
No.m tenh per paiatz,
Si chantar gurpia,
Diatz ab que.m defendria
Dels avols mal ensenhatz,
Que.m fan peitz que neus ni glatz

E s'acors del cors adrech
Ab que.m conort e.m refranh
No me ve sai part l'abril,
Al torn que farai d'Espanha,
Ja lai no crezatz
Que flors ni vergers ni pratz
Gaire m'aiut ni bo.m sia
Ni.l chans pels plaissatz,
Ni d'altrui paria
No m'a grat tan com solia
Ni.m tenh per assolassatz,
Per qu'eu.n prenc mans breus comjatz.

Pero, si m'a.l mon estrech
C'a plana fors'i remanh,
Garatz, s'en un pauc cortil
N'agra ja trebalh ni lanha
Molt es malmenatz
Totz om sobrenamoratz!
Qui per aitan no.s chastia,
Ja.l plus veziatz
No conoisseria,
Si.s tarza ni si s'embria
Sos bes ni sa volontatz,
Pos be n'es apoderatz.

E car no n'esper esplech
De m'amia, cui no tanh
Que tan s'abais ni s'umil
Ja m'acolh'en sa companha,
Pro sui bemenatz,
Si.m denha sofrir ni.lh platz
Qu'en mos chantars l'apel mia.
Per Deu, be sui fatz
E dic gran folia
Per cal razo sofriria
Que.m fezes tan sos privatz,
E doncs que.m n'aconselhatz

C'aissi.m ten Amors destrech
Qu'entendeire ses gazanh
Sui d'un ric loc senhoril
Celat e de terr'estranha,
Don no sui chazatz,
Per que.m par nescietatz
Qu'eu chan, si no m'en venia
Gazardos o gratz.
Pero si.lh plazia
C'apeles per cortezia
Seus mos chans dezamparatz,
Alt los m'auria levatz.

E mostra.m com m'en venria
Jois e bes devas totz latz,
Si.l chan me sofri'en patz.