Main PageTroubadours' ListingMore Works by Giraut de Bornelh

The prosody guide is available as a book. Click here for details.

Can la brun'aura s'eslucha
Pel suau termini franc
Era si de joi m'estanc
Si be.s somelha ni.s clucha
L'amors que.m fara languir,
Si no la.m deslonh'oblitz,
Mal m'er e, si.m falh mos chans,
Tort n'auretz vos, mal'amia

Car vos m'etz un pauc esducha
Si que.m viratz en bru blanc
No per re qu'eu disses anc,
Domn', avetz tal ir'aducha
E s'eu auzes descobrir
Com vos, ma domna.m plevitz,
Que destircs ni mals ni dans
No.m letz que plus vos en dia.

Tal m'avetz tornat c'a lucha
No.m defendri'ad un manc!
E vitz anc greu clop ni ranc,
Si a malpas no trabucha,
Leu n'on posch'avan fugir
Tan sui vas enfrevolitz
Com cel dezamatz amans,
Que de joi se desraia.

La noch, can lo sons m'aclucha,
Dorm sobr'arch'o sobre banc,
Tro que.m dolon am mei flanc,
Per c'ai ma valor destrucha!
Qu'en lech no posc eu dormir,
Ans m'en leu totz esbaitz
E pens de vos en estans,
Contra que m'etz tan enia

Que.l cor dins me crid'e m'ucha
Que no.l rompa ni l'esbranc
De vostr'amor, et eu planc,
Car sai que res no m'afrucha!
Enans me n'er a partir,
Si viure no volh aunitz,
Et es tan sobrers l'afans
Que.m tol repaus e.m destria.

C'ab ma volontat paurucha
No m'a laissat charn ni sanc.
Pustel'en son olh e cranc,
Qui.us me cud'aver forducha
Qu'enans me n'er a fenir
Mo vers que sia complitz!
Mas d'aisso sui plus clamans,
Car anc me noc gens mendia

Qu'eu vi l'or'e vos la vitz,
No cuder'us amirans
Me nogues! Deus los maldia