Main PageTroubadours' ListingMore Works by Giraut de Bornelh

The prosody guide is available as a book. Click here for details.

No.m platz chans de rossinhol,
Tan ai mo cor morn e trist
E pero si.m meravilh,
Car no m'alegret abrils!
C'anc mais no fo negus ans
De joi no.m dones dos tans.
Mas ogan no.m platz la flors
Ni.l fruchs del ram no m'agrada.

Morir me faran de dol
Ist messatger que m'an quist.
Ai car se saubesson ilh
Com sai.m valgr'us paucs cortils
Mais que lai us palais grans
Trop m'es lor solatz pezans
E parra me dezonors,
S'ab lor torn en m'encontrada.

Pauc s'ave d'aisso que sol,
E no cre c'anc mais fos vist
C'om vas sa terra s'eissilh!
Mas me es salvatg'e vils
E.l repairars m'es afans
Peitz trac on plus lai m'enans
Si que vergonh'e paors
M'en dobla quega vegada.

Qui m'o lauza, be no.m vol,
E tu, flac cor, com volguist
Que tan clar'amors roilh,
Anc no.i fezist que gentils!
C'anc cors de dos fis amans
No vi om melhs d'us semblans.
Mas cor que.t sobres Amors,
Tu l'as er'apoderada

Ja per aisso no m'acol,
S'eu lai vauc, celha ni cist,
Que del tornar m'avolpilh
C'us jois sobresenhorils,
On estai ferms mos talans,
Es, tals, per qu'eu no balans,
Don no.m pot lonhar valors,
Si.m veni'en plana bada.

Mas pero pel fort lassol
De la man ab que.m prezist
Velh la noch e m'estendilh
E no t'aturs ni t'apils -
Bela domna benestans,
Cest anars no.m sia dans!
Quez eu tornarai de cors,
E vos no.m siatz chamjada

Anc pairis contra filhol
No fetz tal falha, per Crist,
Ni paire contra so filh
De lai on s'abriva.l Nils
Tro sai on sols es colgans!
Per que deu esser mos chans
Sobrels autres chantadors
Per vos, domna, c'ai amada

Era no.m platz chans ni flors
Per vos, domna, c'ai laissada.