home page ?


Ailas, com mor - quez as, amis -
Eu sui trais -
Per cal razo -
Car anc jorn mis m'ententio
En leis que.m fetz lo bel parven. -
Et as per so to cor dolen -
Si ai. -
As enaissi to cor en lai -
Oc eu, plus fort. -
Est donc aissi pres de la mort -
Oc eu, plus fort que no.us sai dir. -
Per que.t laissas aissi morir -

Car sui trop vergonhos e fis. -
No l'as re quis -
Eu, per Deu, no -
E per que menas tal tenso,
Tro aias saubut so talen -
Senher, fai me tal espaven. -
Que.l fai -
S'amors que.m ten en greu esmai. -
Be n'as gran tort!
Cudas te qu'ela t'o aport -
Eu no, mas no.m n'aus enardir. -
Trop poiras tu to dan sofrir. -

Senher, e cals conselhs n'er pres -
Bos e cortes. -
Er lo.m diatz -
Tu venras denan leis viatz
Et enquerras la de s'amor. -
E si s'o ten a dezonor -
No.t chal -
E s'ela.m respon lach ni mal -
Sias sofrens,
Que totztems bos sofrire vens -
E si.s n'apercep lo gilos -
Adonc n'obraretz plus ginhos. -

Nos - oc be. - sol qu'ilh o volgues -
Er. - que - si.m cres. -
Crezutz siatz -
Be te sera tos jois doblatz,
Sol lo dichs no.t fassa paor. -
Senher, tan senti la dolor
Mortal,
Per qu'es ops c'o partam egal -
Er donc tos sens
Que te valh'e tos ardimens -
Oc, e ma bona sospeissos. -
Garda te que gen t'i razos -

Razonar no.m sabrai ja be. -
Dias, per que -
Per leis garar. -
No.n sabras donc ab leis parlar
Est aissi del tot esperdutz -
Oc, can li sui denan vengutz . . . -
T'espertz -
Oc eu, que no sui de re certz. -
Aital fan tuch
Cilh que son per Amor perduch. -
Oc, mas eu forsarai mo cor -
Era non o torns en demor -

Be m'a aduch
Amors a so, que sabon tuch
Que mal vin qui deziran mor,
Per qu'eu no sai planher mo cor. -
Vas to desduch
Vai, amics, ans c'o sapchon tuch,
Per que no perdas to resor!
Que levet pert om so demor