prosody | miscellaneous |
Chans en brolh ni flors en verjan Ni gens tems, can l'amen'abrils, Ni vertz erba ni blancha flors Tan no m'enansa ni m'atrai Vas un vers far com sol lo mans De mon adrech senhor e.l jais Que.m fai, car ditz que.l loncs espers E.l cudars m'aduira sabers. E si.m dolh dins e defors chan. Per que.m paregra virars vils, Si tan ferm no.m lies Amors Que m'ensenha qu'en son esmai S'esmera coratjos amans E que.m tenha coindes e gais E sofra! que.ls plus chars avers Dona bos sofrirs e temers. E si.m solh anar corelhan, Car me semblet murs lo chambrils. Pero be conosc qu'es folors Que.m planha d'aisso qu'eu non ai! C'assatz me degra bels semblans Paiar, pos chascus ponh'al mais, E, can bos senher a.ls seus ders, Es lo noms avinens e vers. Mas l'orgolh, s'eu.lh sobredeman, Abais l'avinens cors gentils Ab merce, c'aissi m'aura sors, E si s'esdeve ni s'eschai Que.m coche mos sobretalans C'a cal que trop vir ni m'eslais, Franha.s l'orgolhs e.l no-devers, Lo sobramars e.l trop volers Car si.m colh mos precs en chantan, No sui pro savis ni sotils, S'a fach no.m comti las onors E.l bo pensamen que.m sec sai! Car ades cut c'aura tres ans Que.m guidet e.m garit e.m trais De preizo tal qu'en sols dos sers M'agra delit lo remaners. Qu'era.m tolh de mal e d'engan E serai ferms amics umils, Ja n'ai'agutz mans blasmadors Que dizon so qu'eu no creirai Que drutz s'enantisc'e s'enans Ab orgolh! mas no volh que.m bais Mos Bels-Senher, si.l fis plazers Loc no.n demandav'e lezers. E qui.lh n'er primers drogomans Que.m tolh d'altr'amistat e.m lais, Crescha.lh benanans'e poders! Qu'eu no volh baizars ni jazers. E can sobre totz sai no.s trais, No l'es cregutz aquel poders Que dona baizars e jazers. |