prosody | miscellaneous |
Era, si.m fos en grat tengut, Preir'eu ses glut Un chantaret prim e menut Qu'el mon non a Doctor que tan prim ni plus pla Lo prezes Ni melhs l'afines! E qui.m crezes C'aissi chantes, Polira, Forbira Mo chan Ses afan Gran. Mas, a lor veiaire, Car no.n sabon gaire, Falh, car no l'esclaire D'aitan Que l'entendesson neis l'enfan. E ja m'agra del tot vencut, Si Deus m'aiut, Ma bel'amia, mas del trut Levet la ma, Per que mos melher chans rema! Que non es Bo c'om prezentes So que chamjes Ni pejures Per ira. Que vira Talan, Qu'enganan Van Trich- e galiaire Gentil de bon aire No volhatz retraire D'engan Vas celas que galiaran. E pos aissi m'a retengut C'alhors no.m mut, Volha c'aia joi e salut! C'aissi parra Si dic ver d'aisso don m'i va: Que, si.l bes C'aten no.m tarzes, Sol comenses, Eu pois ades Grazira, Servira Chantan E lauzan L'an Que.m fo comensaire D'esquivar maltraire. Tan sui fis amaire Qu'enan Vai m'amors ades esforsan. Pero ben ai lo tems agut Quez a perdut M'o tengra, s'agues tan volgut, Ni mes en va Mo chantar, mas aissi s'escha, Tro merces O melhur apres. E qui.m mostres Com m'en lonhes, Garira, Gandira Lonhan Esperan Man Deviro Belcaire! Car no posc de laire Mo fat cor estraire Ni blan La perda que pris per lo gan. Aissi m'es tot dessovengut Can ai vezut, Car sol m'apelet un jorn drut E, si m'estra So que.m dis, malestan sera! C'anc, pos pres Aguem que m'ames, No.n cut proes Qu'en re.m vires. Mentira Sofrira Pensan Sofertan, Can Me volc amors faire! Mas, pel chap mo paire, No serai confraire Denhan D'amor que.m prenda de l'un pan. C'anc no.m plac amors per escut A cors batut D'un privat e d'altr'escondut Mas qui.m volra, Tota l'aurai e tot m'aura. No dic ges, Ans que.l tot perdes, Non esperes! Que drutz engres S'aira, Sospira Cudan, Menassan Dan. Pero sofertaire Pren enans repaire Que glotz menassaire Cridan Cals colps faria de so bran. Fols es domneiaire, S'ab critz ni ab braire Vas se vol atraire Preian Bona domna ni benestan. |