home page ?


Tot suavet e de pas
Rien jogan
Vauc un chantaret planan
De dichs escurs
C'us non i remanha.
C'aissi leu, si s'era plas,
Poiri'entrels Chatalas
Passar en Proensa!
Que chansos leu entenduda
Lai val e lai s'esvertuda.

E tu que la.i portaras,
Si.t vas tarzan,
Potz n'aver damnatge gran,
C'ab bos aurs
Issiras d'Espanha!
C'us m'a dich dels bos Espas
Duchs e ferms e seguras
D'aital conoissensa
Que bos aurs non aiuda,
Des c'om so conselh refuda.

Vai t'en, que bon'anaras,
Al meu semblan,
E pero membre.t del gan
Don mos Segurs
Fetz avol barganha
Que.l seus rics pretz sobeiras
Es tornatz fragils e vas
E d'avol parvensa,
Per qu'es mort'e dechazuda,
Si.l cor flac en ferm no muda.

Tot sui del chastiar las,
Mais a d'un an,
Mas al seu leuger talan
No.m val aturs
C'ades me gavanha,
Per que cudav'esser sas!
Mas s'eu fos dins de Milas
Ni deves Faensa,
No.m degra levar tal bruda,
S'ela s'es mal chaptenguda

Torna sai, que non iras
Un pas enan,
Fe que.t dei, que per aitan
Sui eu perjurs
E fis de gran lanha,
Can qu'en traines certas
Pos vas fina.m sui trafas,
Ja.l senher d'Argensa
No.m dira que bona druda
Per drech non aia perduda.

Ditz tu que no remanras,
S'eu t'o coman
Vai donc, e si.t prec del chan
Que no.l peiurs,
Coras que.t sofranha
Bos albercs, c'ostes vilas
Auras, si Sanchs-Julias
L'ostal no t'agensa!
C'un'avols rassa menuda
Lai m'an baralha moguda.

Mas ges d'aitals guerrers bas
Non esper dan
Ni no m'espert, s'ilh se fan
Valhatz ni murs!
Que l'obr'es de fanha
C'ans dechai c'us chauls vertas
E com venria bos gras
De mala semensa
Ni per gen desconoguda
Cal vitz be razo tenguda

C'ab entendedors bauzas
Torn'en recrezensa
Cortezi'ab gauch venguda
Pauc prezad'e viltenguda.