| |
|||
| prosody | miscellaneous |
Ges de sobrevoler no.m tolh Per folha d'arbre ni per flor, Ans m'en do mais d'aitz en pascor, Can chanta.l rossinhols els plais! Per so.m fui jais, E qui trop chass'a no-dever, Greu pot sezer Que.l trop no.l vir lai on l'er dans So c'ab mezura.lh fora pros. Qu'eu vi l'ora quez al prim folh Cobrav'en dobles ma valor Er'a mala merce d'Amor La dolz'aur'e l'erba que nais Es mos esglais! Qu'ela.m fetz e.m fai er'aver Cor ses poder D'aco c'un pas no lai m'enans, C'apres no.m fassa lonhar dos. E donc per que non o desvolh, Pos aventura no m'acor Car anc no vi fin amador Ab poder que d'amar s'eslais. De grans eslais N'ai eu ja fachs vas no-chaler Et ans del ser M'era si doblatz mos talans Que.m fora melhs que res no.n fos. Farai donc vas Amor orgolh, Si.lh dic que.m tenh a dezonor, S'ans don'ad un galiador C'a me que.lh sui fis e verais Era no m'ais! Aisso.lh dei eu en grat tener, Si.m fai voler Tal amia que de mil tans M'onres sola sa sospeissos Com fatz, pos ela no m'acolh Ni.m sofre per entendedor Per Deu, vers es, ans ai paor! Que.l seus gens cors conhdes e gais Vol qu'eu abais E par, per que m'en dezesper, Plus esser ver Ab bels dichs et ab bels semblans Que m'aia brau ni orgolhos. E s'eu ja torn vas Essidolh, Vau viran de mal en peior, Que per domna ni per senhor No.m vol lo trop mover del fais. Abans, s'irais Can sap que.m deuria valer, Be.n dei temer Que s'aiuda.m sia desmans, Pos c'a dich mal de mas chansos. E pero veiatz en l'escolh Linhaure vers de trobador E no.m n'aiatz per gabador, Si tan rics motz me passa.l cais! C'aitan m'atrais M'essecha de so bel saber Per qu'eu esper, Quez ab mo ver dire bobans, C'a defendre.m n'ai arazos. Mas lai ai pen'e sai afans! No.m sai que s'es amics, Joios. Pero be volh que.l reis Ferans Auia mo vers e.l reis n'Amfos |