| prosody | miscellaneous |
Tot gen m'estav'e suau et en patz Tro.l jorn c'amors entret en mo coratge! Qu'eu non amava ni non er'amatz Ni.m sentia d'amor mal ni damnatge. Era no sai qu'i s'es ni se deve, Qu'eu am cela quez ilh no m'ama re E si.n tenh eu tot can ai en bailia E tot lo mon, si fos meus, en tenria. Lo cor en tenh en loc d'altras rictatz E mas chansos en loc de vassalatge E, s'eu fos reis ni ducs ni amiratz, Fera rics fachs per s'amor e barnatge E, car non ai lo poder que.m conve A leis servir, eu ai ma bona fe E bona fe, qui be la conoissia, Degra prender en loc de manentia. Be sui manens del maltrach que.m donatz Sofrir en patz, Deus m'en don alegratge E sui paubres, can vos no m'esgardatz Et als altres d'entorn fatz bel vizatge E me que.us am non esgardatz per be Et eu domnei mais que no m'enconve E s'eu quer so c'a me no.s tanheria, Forsa d'amor m'i fa dir la folia. C'aissi m'espert, can vei vostras beltatz, Com lo conhatz de Galvan per salvatge! Can per guerra n'ac totz sos filhs menatz E sa filha queria per oltratge, El endema rendia la.lh ab se, Entro qu'Ivans los defendet, e me Defend'ab vos merces e cortezia E si voletz ja re guirens no.m sia Dels lauzengers me tenh molt per pagatz - So que no fai om mais, de me l'engatge - , Car m'an faidit del pais on estatz Qu'en tan m'era lo vers Deus d'agradatge Qu'eu fora mortz! que fis amics can ve So c'ama fort e l'altra pro no.i te, Mor de dezir, don volh mais que m'aucia Amors sai lonh que lai si non l'avia Aver no posc, que tan i a de be E de beltat c'a fugir m'en ave E ses domna serai tan can viuria Si vos non ai, e qu'eu ses domna sia Pro contessa que Proensa mante E tot lo mal i fai tornar en be, Chaps etz de pretz e chaps de cortezia, Per qu'en val mais Savoi'e Lombardia |