Main PageTroubadours' ListingMore Works by Giraut de Bornelh

The prosody guide is available as a book. Click here for details.

Car non ai
Joi que m'aon,
Me te de
Chantar soven
E, si m'enten
En far chansos,
No m'es pros!
C'aissi com solia
No.i posc avenir,
Ans m'en cut partir.
E gicrai m'en
No per re
Qu'era.m sove
Qui.m pres e si.m ris
Fors de mo pais.

E dirai
Qui es ni don
Non eu, que
Leugeramen
Falh e mespren
Qui.s fai janglos
A sazos.
Per que, s'eu dizia,
Cui am e dezir
Pert, si no consir!
C'ab falhimen
S'estrai se
Cilh cui quer be,
Cui eu sui plus fis
Qu'Elena Paris.

Mas no sai
Com de preon
M'aperte
C'ai marrimen
E de nien
Fatz me gilos
Enveios,
Cais qu'eu conoistria
Per sobras d'albir.
Mas si Deus m'air,
S'eu veramen
Be no.n cre,
Si no.m refre
D'aisso que m'es vis
Que dolz m'er vezis

Donc no.m vai
Lo melhs del mon
S'om no ve
Contravalen
Al seu cors gen,
Ben es razos
C'amoros
E jauzions sia
Cui denh'acolhir
En grat so servir
E cui consen
Josta se,
Ja, per ma fe,
Melhs non er'assis
Fola res, que dis

Que ja.m fai
Mal e confon.
Deus, merce
Can fadamen
Parlam soven,
Si que.l manbos
Ditz que tos
Com me confondria,
Si.m fai esjauzir
Ans li dei grazir
Lo pensamen
Que m'en ve,
Ab que m'estre
De so que l'ai quis,
Que sols la servis.

Era.m trai
Vas mo segon
Ad esple
Tot mantenen
E port prezen
Al rei n'Anfos
De mos sos!
C'altra manentia
Non ai mas de dir
Que l'aus perofrir.
Car a valen
E mante
Pretz, me conve
Qu'eu l'estei aclis
Sers oltramaris.

Razo s'enten,
Si.l mante
Vas sanh terre,
Car trop mais conquis
Sobre Sarrazis