Main PageTroubadours' ListingMore Works by Giraut de Bornelh

The prosody guide is available as a book. Click here for details.

Los aplechs,
Ab qu'eu solh
Chantar, e.l bo talan
Ai eu, c'avi'antan!
Mas car no trop ab cui,
No.m deport ni.m desdui
Ni no sui benanans.
Ai Deus cals dans
S'en sec e cals damnatges,
Car cortz e bos uzatges
Aissi menuz'e falh,
No.i a nulh refrenalh
Mas, car mo senhor platz
Jois e chans e solatz,
M'esjau ab sos privatz
E, can m'en sui lonhatz,
Irasc m'ab los iratz.

Mas destrechs
M'en destolh,
Per que.m vauc regaran
Si ja s'alegraran
Car ges a joi no fui
Qui.ls plazers non esdui
C'a me platz ades chans
E bels mazans
E cortz e vassalatges,
Ja perd'els rics linhatges
Paire pros so miralh!
C'oi ses esperonalh
No s'esmera barnatz
E, si.l pair fo lauzatz
E.l filhs se fai malvatz,
Sembla.m tortz e pechatz
C'aia las eretatz.

Donc cals drechs
O acolh
Que.l filhs ai'atretan
De rend'e.l pretz soan
Ni cals razos adui
Que melhs no tanh'altrui
Qu'eu cre que fos enans
Oltra mil ans
C'onors e senhoratges
Davon pretz e coratges
E costas e trebalh,
E.l filhs, si.l melhs trassalh,
Non es donc forlinhatz
Era com no mostratz,
Vos savis, que jutjatz,
S'als pros fo.l dos donatz,
Com er dels desprezatz

Mas nelechs
Er, si.m tolh
De solatz ni de chan
Per cels qu'i falhiran
Que fol tenhatz celui
Que se mezeis destrui
Ni.s vira malanans
Per no sai cans
Cui jois par nesciatges!
C'oi sabers ni paratges
Non es que no nualh,
Pos alegransa.i falh,
E no.s chamje viatz,
E que.us valra rictatz,
Si ja no.us alegratz
Qu'emperis e renhatz
Es ses joi paubretatz.

Mas l'adrechs
Cors qu'eu volh
E dezir e reblan
M'a trach d'ir'e d'afan
E, si jois la.m condui,
Ja no sabran mas dui
Los entresenhs ni.ls mans!
Qu'enois es grans
E sobeiras folatges,
Can per nescis messatges
Vilas ni d'avol talh
Eschapa del guinsalh
Ni fui bon'amistatz.
Mas eu.m sui be gardatz
C'anc no.n fui encolpatz!
C'oi non es vius ni natz
Per qu'eu en fos proatz

E l'esplechs,
S'ilh m'acolh,
So que.lh querrai chantan,
Remanh'al seu coman!
C'ab bels plazers redui,
Can no.s volf ni.s defui
L'adrechs cors benestans
Ni.l bels semblans
Ni l'amoros vizatges,
C'avinens es lo gatges
Que dels olhs al cor salh,
Per qu'eu, qui que.s baralh
Ni s'apele forsatz,
Me tenh a be menatz,
Can trop ben acordatz
Lo coratg'e la fatz
E.ls dichs ben ensenhatz.

E pos enans no valh
Ni no sui aizinatz,
Bels-Senher, sofertatz
Qu'eu chan ab c'o sofratz,
Conosc be que.l comjatz
Porta plus de mil gratz.

A'n Sobre-Totz diatz,
Vos que mo chan portatz,
Que sai s'es tan tarzatz
Qu'el en semblara fatz.