prosody | miscellaneous |
Ja.m vai revenen D'un dol e d'un'ira Mo cor! qu'er'aten Per sol bo conven Benanans'e jai, Per qu'eu chantarai. C'ogan no.n pensera, Pos vergers ni pratz No m'adui solatz Ni chans pels plaissatz Que l'auzelet fan Vas lo torn de l'an. Ni ja l'avol gen Paiatz no sofrira! C'apensadamen Van vas valor len, Per que pretz dechai. Ren als no.us en sai, Mas ja no cudera Fos aissi viatz Jois dezamparatz Vos m'en conortatz, Domna, per cui chan E.m vauc alegran. E per vos defen So que plus me tira Que no m'es parven Pel bo pensamen Que n'agui e n'ai, Pos plus no m'eschai. C'assatz melhs chantera, Si.l gens cors onratz Me fos plus privatz, E pero, si.us platz, No.i dei aver dan, Si.us me prec chantan. C'ab plus d'ardimen Mo fat cor no.s vira, Tan no m'espaven Ans me ditz soven C'a mo dan serai, Can vos preiarai, Pos aissi m'etz fera, Car sol o cudatz, Ans que re.n sapchatz. Si plus n'auziatz, Paor me fai gran Que.m dobles l'afan. Mas mon escien Tot'altra.m sofrira Plus d'envazimen. Parlem belamen! Diatz o dirai: Cal tort vos aurai, Si.us am o enquera Vos me prec forsatz, Pos pres e liatz Sui ja no crezatz C'om sobre talan, Ja m'ane garan Car qui.l drech enten D'amor ni.n sospira, No.i pot aver sen De gran jauzimen, S'ab foldat no.i vai! C'anc drut savi gai No vi, c'ans esmera Lo sen la foldatz Qu'era, s'amavatz E.l sen creziatz, Per pauc de semblan Iriatz doptan E per aisso pren Qui trop no s'albira Primers, car consen So c'altre repren. Ges be no m'estai, Si.us me prec, de lai! Eissamen m'amera Com vos vos amatz Que guerra.m fassatz Mas sofretz en patz! Que cilh venceran Que melhs sofriran. Qu'en patz e sofren Vi ja que.m jauzira D'un'amor valen, Si leugeramen Per fol sen savai No.m fezes esglai So que m'aiudera, S'eu fos veziatz! Mas fezi.m iratz Per c'altre senatz, Can m'anei tarzan, Pois e pres enan. E pois sofert era Maior tort assatz, Can m'en sui lonhatz, E sui n'esfredatz Per que.us prec e.us man Que sofratz aman. Be.m platz que l'aman Amon sofertan. Car cilh venceran Que be sofriran. |