Main PageTroubadours' ListingMore Works by Giraut de Bornelh

The prosody guide is available as a book. Click here for details.

Qui chantar sol
Ni sap de cui
Ni cre
Que sos plazers l'enans
Sos solatz ni sos chans,
Era pos els verjans
Par la folh'e la flors
E colora.l pascors
Los vergers e los pratz,
Si sa razos li platz,
Chan oimais e conhdei.
Que ren el mon no vei
Que joi ni solatz valha!
Que guerra ni batalha
Ni nauza ni tensos
Non es mas trics als pros.

Per qu'eu - cui dol,
Car jois m'adui -
Deme
Mos chantaretz voians
De salutz e de mans!
Am tan pretz e bobans
Qu'entr'altres chantadors
M'abat ma mei'amors
E.m reten a solatz.
Pro vetz m'en sui lonhatz
E menatz e felnei!
Pero, pos enfolei,
Torn ferir en la palha
Don esper que.l gras salha,
Que no.i fos la meissos,
Com om sobramoros.

Mas s'eu m'ai dol,
Car aissi.m fui
Ni.m te
L'amors, don lo talans
No.s part, cui sera.l dans
Meus er cui sec l'afans
E l'ir'e la paors!
Tan tem c'al chap del cors
Remanha.l pros e.l gratz.
Sui ges trop desreiatz
En dir so que no dei
Be pot esser! mas vei,
Si mos brans noca talha
Ni no.m las ma ventalha,
C'a mas bonas chansos
Se tanh be gazardos.

E, deus c'om vol,
So que la dui
Mais, be,
Deu donc esser clamans
D'un cal que dezenans
Ans es lo meschaps grans
E.l tortz e la folors
C'om de do de senhors,
Desque sera chassatz,
Se fassa trop cochatz!
Mais esper e mercei
C'us fols ab son agrei,
Que.s n'auci e.s tartalha,
Ve.i pro vetz que nualha
Valers e gratz e dos,
Car es sobrecochos.

E qui so.m col
Que ges altrui
Per re
No colri', es semblans
C'anc i toches engans
Ans es plachs benestans
A fis entendedors
C'om de solas onors
Se tenh'a be menatz.
De me es be vertatz
Qu'en cal que part m'estei,
Vas l'amor no vanei
Que.m sojorn'e.m trebalha,
Si.m desbois'e m'entalha
D'un adrech cors ginhos
Sas avinens faissos.

E qui.l lassol
Romp ni destrui
C'a fe
Guida lo drech balans,
Es en vertat soans
E sia dichs truans
E fals! qu'entr'amadors
Es la maier lauzors
Celars e fermetatz.
Dels fis sia triatz
E.l melhs d'Amor abnei,
Qui so drech ni sa lei
No sec e pren gazalha
De tans, que d'un no.lh chalha!
C'anc, pos una.n volc dos,
Me non amet ni vos.

D'avol aiol
Par, que redui
Qui ve
Ni vi paiatz demans,
Que no n'a gaire dans!
Que cel que pogr'enans
Far a l'altre socors,
Se tenia per sors
E per ben arribatz.
Er'es l'afars chamjatz
De pretz e de domnei,
C'un non auch ni no vei
Que mezura.n trassalha!
Pero qui non egalha
Pros e dans a sazos,
No.m par c'anc amics fos.

A tort s'esmol
Qui.l seu esdui
Ni se
D'avinens fachs prezans
Ni s'i para doptans.
C'anc, pos s'estreis Costans
Ni.s viret als maiors,
No s'alevet valors
Ni s'aerc largetatz
E, pos eu.n sui passatz,
Que dich n'ai so que dei,
Leu, si.s vol, o sordei
Mas si part Escoralha
Lo coms Guis d'escombralha
Desliures sos preizos,
Lonh n'anera.l resos.

E pos tan s'esparpalha
Lo plegs, ja sai no salha
Ni pass entrels Gascos,
Per que.s perd'Aragos

Senher Sobre-Totz, vos
Siatz ades dels pros

E tu vai t'en, chansos,
A'n Rigaut, d'enveios