Main PageTroubadours' ListingMore Works by Giraut de Bornelh

The prosody guide is available as a book. Click here for details.

Be for'oimais drechs el tems gen,
Pos la brav'aur'e.l frechs s'en vai,
C'ab l'acors del termini gai
Jovens, qu'es demechs mortz, cobres
E c'om l'acolhis e l'onres!
Que si jois mor, gran dol en ai,
Can vei c'ab folha ni per flor
No sortz ni cobr'en sa valor,
E car s'esdui fians'e fes
E cortz e bes,
Per pauc en l'ira que m'en ve
Totz fachs de solatz no.m rete.

Mas ges a mo cor non aten
Tan com auch precs c'us quecs m'en fai.
C'anc mais o d'abril o de mai
No fo que l'us no m'alegres!
Era m'es chascus plus engres
E pero si.m conortarai
Ses alegrer e ses amor
E no cut sapchatz chantador
Que d'aital plach s'entremezes.
E donc com es
Qu'eu ses joi cut chantar e be
Que totz bos chans sofr'e soste

No pot esser, que ben o sen!
Ans que m'en fenha no s'eschai
Ja ses joi be no chantarai!
Qu'enquera no cut c'om chantes
Ses amor qu'el cor no.lh mostres
So que pois forses sen ab jai.
Pero trobar e trobador
Sonon de diversa color,
Que tals cud'esser ben apres
Que no sap ges
Com egals chauzimens conve
Vas desmezur'e vas merce.

Car ges segon lo chauzimen
Trobars no leva ni dechai,
Mas als francs coratges s'atrai
Lo drechs sens e.l bos dichs apres!
Car qui per mo bo dir m'ames,
Tot distra.lh que dich non aurai.
C'ades a la bona sabor
Serf la leng'al cor e l'acor
E ren dels bes bonas merces
E del mal pres
Mals gratz tot aissi com l'ave!
Que si.m fer'eu vos e vos me.

Vos sabetz ab cal jauzimen
Foron amic fin e verai!
Mas er'es tornad'en afrai
Bon'amors, com que comenses,
E cudava que.s melhures,
Mas ja mais non o cudarai!
C'una mal'enfruneza cor,
Don domnas e lor amador
Son ochaizonat e mespres
Que, si.m legues,
Eu eis cut qu'en distra tal re
Qu'enemics li fora jasse.

Car no quer drech de falhimen,
Ai cen vetz perdut e perdrai,
Ja pos non ai dich ni dirai
So don cela s'endrechures,
Qui m'a.l tort e lo m'ac ades
Per qu'eu so cre: no.m lauzarai
De leis, c'ades la trop peior
Plus que sers fai de mal senhor!
Can l'a servit dos ans o tres
E, desc'a mes
Tot so que pot, lui no.n sove,
No l'ama ni.l preza ni.l cre.

E si no fos que vauc temen
Per so m'estortz, car m'en estrai
Ja, si Deus me do tornar sai,
No.m fora pros, si.lh demandes
Merce, per so que la.i trobes
Empero si.lh perdonarai
Clamans e com a mal deutor
C'om eschaen a trop melhor!
Que.m valgra molt, s'a Deu plagues,
Qu'ela.m parces
Tans tortz com eu l'ai fach ancse,
Don ges enquera no.m recre.

E si lai on fo mortz o pres
Me conduisses,
Sobre totz eu virera.l fre
Vas lo senhor de Sanh-Sere.

Qu'entrels Espas vai jois e ve
E.i guid'e.i chabdel'e.i chapte.