The Democratic Republic of Poetry
Giraut de BornelhTroubadoursProsodyNoveltiesLinks

The prosody guide is available as a book. Click here for details.

Si sotils sens
O plas aturs no.i val
Que mos leus chans
Valh'e poi e s'esmer,
No m'es per re semblans
Que poscha molt valer!
Que la cud'e l'esper
Que m'en sol aiudar
Part et a me no par
Que nuls chantars
Sia valens ni chars,
Si cudars o temers
O pezans'o plazers
No m'ensenha com chan
Grazissen o claman.

E car no vens
La benanansa.l mal,
Es grans afans
Celui que trop sofer
C'ades sia clamans
De l'altrui no-chaler.
Voletz que.us dia.l ver
Que.m desplatz en amar
C'om lai poscha trichar
Ni si'avars
Celui qui.lh s'era clars
E bevolens e vers.
Dazai aitals poders
C'om son amic engan
Ni.s paie de so dan

E si.l cors gens
Se vira, no m'en chal
Vas fols mazans.
Ab so que no s'esfer
De salutz ni de mans,
Cut c'ab menhs de jazer
Me poira retener!
Car molt fai a prezar
Cortes assolassar
En mans afars,
On se demor'amars,
E fai de grans plazers
E pois adob'us sers
La corelha d'un an
A cels que ben i van.

E s'eu sui lens
Ni vir lo cor leial
Ni.l dezenans
De so qu'el vol, enquer -
Mas lais m'en - , a tres ans,
Qu'eu trop en mo saber
Pos me donet lezer
Ses forsa de preiar
Mos-Senher de chantar
E mos trobars
Fo per s'amor espars,
Adonc m'ereup e.m ders
E falhira.m sabers,
Si per mais que.lh deman
Enquer com m'o desman.

E si.m bistens
Ni.m te.l reis ni.lh reial,
Lo pros es grans,
Ma.l dans no sai cals er,
E s'ilh es corelhans,
Car s'auzet eschazer,
Del venir, so plazer
Fassa del be venjar.
Pois si.m letz esperar
Els osteiars
Que.lh rei faran, l'anars
Val mais que.l remaners,
Pos rictatz ni valers
No s'en pot poiar tan,
Qu'eu trespasses so man.

E Deus agens
Ogan nostre chaptal
E.l nos enans
Tan que Sarrazi fer
Sofran perdas e dans,
Tro venh'al dechazer.
Et om no deu temer
Mal per Deu gazanhar
Ni no fai a doptar
Lo comensars,
Que Gascos e Navars,
Si lor aond'avers,
Aduira.l bos espers
E Deus ira denan
Los nostres chabdelan