| |
|||
| prosody | miscellaneous |
Un sonet fatz malvatz e bo E re no sai de cal razo Ni de cui ni com ni per que Ni re no sai don me sove E farai lo, pos no.l sai far, E chan lo qui no.l sap chantar Mal ai, c'anc om plus sas no fo, E tenh malvatz ome per pro E don assatz, can non ai re, E volh mal celui que.m vol be! Tan sui fis amics ses amar C'ancse.m pert qui.m vol gazanhar. Ab celui vauc que no.m somo E quer li, can non a que.m do. Per benestar sui ab Jaufre, C'aissi sai far so que.m conve Qu'eu.m leu, can me degra colgar, E chan d'aco don dei plorar. Detorn me vai e deviro Foldatz, que mais sai de Cato. Devas la coa.lh vir lo fre, S'altre plus fols no m'en rete! C'aital sen me fi ensenhar Al prim qu'era.m fai foleiar. Drutz ai estat una sazo Senes engan ab traizo. Ab orgolh ai clamat merce A l'altrui obs si com per me Qu'estra mo grat cut achabar E quer so que no.m volh donar. Domna sai, ja no volh que.m so Ni, si.m fai mal, que lo.m perdo. Si.s volia colgar ab me, A pauc no vos jur per ma fe Que pro m'en faria preiar! Mas no.n deu om trop soanar Si.m fezes ben, en gazardo Eu sai be trobar ochaizo Per que.l servizis s'i recre. Mas so d'aquels derrers s'emple, Per malvestat cudan levar E mais valer per sordeiar. No sai de que m'ai fach chanso Ni com, s'altre no m'o despo! Que tan fol a saber m'ave, Re no conosc que m'aperte. Cela m'a fach oltracudar Que no.m vol amic apelar Eu cut chauzidamen parlar E dic so que.m fai agachar. Ela.m pot en mo sen tornar, Si.m denhava tener en char. |