| |
|||
| prosody | miscellaneous |
Lo dolz chans d'un auzel, Que chantav'en un plais, Me desviet l'altrer De mo chamin e.m trais E josta.l plaissaditz, On fo l'auzels petitz, Plaisson en un tropel Tres tozas en chantan La desmezur'e.l dan C'a pres jois e solatz! E vengui plus viatz Per melhs entendre.l chan E dissi lor aitan: Tozas, de que chantatz O de que vos clamatz E cobret so mantel La maier, que saup mais, E dis: d'un encombrer Que mou dels rics savais, Per qu'es jovens delitz! C'aissi com pros es guitz Ab bo pretz, que.l chabdel E.l cresch'e.l par enan, Se son mes a so dan Li peior dels malvatz! Que, si vos alegratz Ni.n faziatz semblan, Ilh vos aguizaran Com ja joi non aiatz, Si ges lor etz privatz. - Toza, ges tan isnel No son vas bos assais Com foron li primer, Can aondava jais E chans era grazitz. Qu'eu eis, don sui marritz, No trop sol qui m'apel Ni.m quera ni.m deman! Ans fui raubatz ogan Entre tres reis prezatz Si que l'us dels renhatz M'o vai contrarian, E parec al ferran Que m'era gen donatz E fo mal prezentatz - Senher, d'avol fardel Se chargu'e d'avol fais Qui rauba soldader Ni s'en vest ni s'en pais, E.l locs es molt aunitz On el es acolhitz. Aital lairo fradel Ple de mal e d'engan Si ja.l sofre ni.l blan Nulh'alta poestatz, Greu pot esser onratz, Que be leu se diran Cilh que non o sabran Qu'el eis n'es encolpatz O.lh n'eschai la meitatz. - Ami', el tems novel Soli'om esser gais! Er no vol om verger, Entro que.l fruchs l'engrais, Ni no platz chans ni critz. Totz lo mons es marritz E plus li jovensel Que nulh conort no fan! Qu'eu vi que per un gan, Si lor fos enviatz, Se mesclav'us barnatz Que durava tot l'an! Er vos escondiran Lor daufas amistatz, Pos qu'en fo.l pretz triatz. - Senher, li fort chastel, Don la maleza nais, E li mur e.lh terrer De tort e de biais An tolt dos e convitz! Qu'er non es om garnitz, Si no fai manganel Que pas sobre l'anvan, Don ira pois cridan Us vilas enrabiatz Tota la noch: velhatz, Qu'eu ai auzit mazan Et adonc levaran, E vos, si no.us levatz, Seretz ochaizonatz. - E que.m val, si.m revel, Amia, ni m'irais Cudatz vos que.lh derrer Se metan en eslais Per aitals colps petitz Ni joves endurzitz, Pos que.l tir a la pel, Se venha melhuran Per pauc colp de verjan Ni que.s fassa viatz C'us vers prozom preiatz Se don a parsonan Doptara pois l'afan E.s tenra per grejatz, Si gaire.lh demandatz. - Si.l senher de Bordel, Amics, no.n sofre.l fais E no.s da consirer Com del tot non abais Lo mons, fos o peritz Que, pos jois er falhitz, Re tot l'als non espel A bo pretz benestan, Ni ja lai non iran Ni Deus ni fes ni patz O.l senher renh'iratz! C'a lui s'azesmaran Cilh qu'entorn lui seran, E, pos que jois li platz, Alegran s'en totz latz. - Toz', eu m'irai laissan De chantar mais ogan, S'a mo Sobre-Totz platz, Qu'eu no sui enastratz. - Senher, li dui Bertran Sai be que vos diran Que.us etz mal conselhatz, Si del chan vos laissatz. - Toza, totz dezonratz Es c'ama dezamatz. - Senher, sofretz en patz! C'aissi seretz amatz |