| prosody | miscellaneous |
L'altrer, lo primer jorn d'aost, Vinc en Proensa part Alest E chavalchav'ab semblan mest, Qu'ira.m tenia sobrera, Can auzi d'una bergera Lo chan jost'un plaissaditz, E, car fo suaus lo critz, Don retenti la ribera, Volsi.m lai totz esbaitz On amassava falguera. E si tot s'avia pel brost Estrecha.lh gonela que vest, Ans que li demandes: don est Ela.m tenc a l'estribera! Pois me dis: per cal dressera Venguetz ni don etz issitz Ja.m sembla siatz marritz! No m'aiatz per trop parlera, Que, car etz sols escharitz, Ai be drech que vos enquera. - Toza, be.us dirai, can que cost, Pos tan gen m'en avetz enquist, Cals aventura.m mena trist: De bon'ami'ai nescera Que fos fin'e vertadera! Qu'era me sui departitz D'una fals'abetairitz Que.m fa chamjar ma charrera E fora.m chabdels e guitz, Si no fos tan volatera. - Senher francs, ja, qui que s'ajost Ab rich'amor, non er, per Crist, Si tot s'a pron auzit ni vist, Ses clam! c'una chavalera Vol be c'om en fachs li mera Sos bes e.l mals si'oblitz. C'ades no.n siatz garnitz, Tornara.us d'altra manera! Qu'estas altras chamjairitz Segon tost altra charrera. - Toza, Deus volha qu'el'angost Del mal que tanta pena.m bast E perda.l dormir e.l depast! Mas vos ab la tencha nera No crezatz qu'eu plus vos quera Per so car gen m'acolhitz, Vos serai francs e chauzitz, Car conve qu'e.us en refera Merces, car no.us en fugitz! C'a lonh m'avizetz primera. - Senher, be m'agr'obs drutz que.m s'ost De fach qu'enquer a loc no.n tast, Que.l cors ai pauc e de sen chast, Si be.us me fatz prezentera, Pos cut segon ma paubrera Que.m sia datz bos maritz! Mas car tan pauc m'enqueritz, C'ab fis sagramens plevitz Auretz m'amistat entera. - Toza, be.n fora garitz, Mas tan es ferma.lh razitz Que mou d'eslais part Lobera! Que.l mals, pos s'es endormitz, Ai paor que peitz me fera. - Senher, ges non etz arditz, Car del mal que.us esfugitz Temetz que pois vos enquera! Mas pos tan m'etz abelitz, Sojornem en est'ombrera - Toza, n'Escharonh'es guitz De pretz, que.m det, companhera Cortez'e fin'amairitz, Per que.l mals me fug a tera. - Senher, un pauc etz falhitz, Qu'era d'altra companhera Parletz que fossetz aizitz, Si tot s'es plus ufanera |