Main PageTroubadours' ListingMore Works by Giraut de Bornelh

The prosody guide is available as a book. Click here for details.

Era.m platz, Giraut de Bornelh,
Que sapcha per c'anatz blasman
Trobar clus ni per cal semblan.
Aisso.m diatz
Si tan prezatz
So que vas totz es comunal!
Car adonc tuch seran egal. -

Senher Linhaure, no.m corelh,
Si quecs se trob'a so talan!
Mas me eis volh jutjar d'aitan
Qu'es mais amatz
Chans e prezatz,
Qui.l fai levet e venansal,
E vos no m'o tornetz a mal -

Giraut, no volh qu'en tal trepelh
Torn mos trobars quez om am tan
L'avol co.l bon e.l pauc co.l gran.
Ja per los fatz
Non er lauzatz!
Car no conoisson ni lor chal
So que plus char es ni mais val. -

Linhaure, si per aisso velh
Ni mo sojorn torn en afan,
Sembla que.m dopte de mazan
A que trobatz,
Si no vos platz
C'ades o sapchon tal e cal
Que chans no port'altre chaptal. -

Giraut, sol que.l melhs aparelh
E di'ades e trai'enan,
Me no chal, si tan no s'espan!
C'anc grans viltatz
No fo denhtatz!
Per so prez'om mais aur que sal
E de chan es tot atretal. -

Linhaure, fort de bo conselh
Es fis amans contrarian!
E pero, si.m val mais d'afan
Mos sos levatz,
C'us enraumatz
Lo.m dezagens ni.m dia mal
A cui om no.n deia censal -

Giraut, per cel ni per solelh
Ni per la clardat, que resplan,
No sai de que.ns anem parlan
Ni don fui natz!
Si sui torbatz,
Tan pres d'un fi joi natural
Can d'als consir, no m'es coral. -

Linhaure, si.m vira.l vermelh
De l'escut cela cui reblan
Que volh dir: a Deu me coman
Cals fols pensatz
Oltracudatz
Me trais doptansa desleial
No.m sove com me fetz comtal -

Giraut, greu m'es, per Sanh Marsal,
Car vos n'anatz de sai nadal. -

Linhaure, que vas cort reial
M'en vauc ades rich'e chabal.