| prosody | miscellaneous |
S'es chantars ben entendutz E s'ofris pretz e valor, Per qu'es lach de trobador, Desque sos chans er saubutz, Qu'el eis en sia lauzaire Que be pareis al retraire Si.lh n'eschai blasmes o laus. E bos pretz reconogutz Dur'ades d'una color, Si.l senher gara com cor! C'aissi sera greu vencutz. E qui fort es rabinaire, No sap ni no.s pot estraire C'ans termini no repaus. E bon'amistatz de drutz, Qui la noiris ab temor, Fai bo fruch e bona flor, Can chascu n'eschai salutz! E no.us aizinetz gabaire, Si ja re fatz fis amaire, Ans conve francs e suaus. Qu'eu ai d'amadors vistz mutz, Pois s'i feron gabador! Can guerra sors entre lor, Lo gabars es remazutz Escharnitz! sobregabaire, Dins o defors so repaire, A peior perilh que naus. Lo vers auzitz e mogutz Coma de bo trobador Pois reverti en error, Lo chans can er'asaubutz, C'us s'en fazia clamaire Dels dichs don altr'era laire, Com fetz de la gralha.l paus. Rics ja vitz dechazegutz, Pos foron larc donador, Car per agrei de folor Remania lor pretz nutz, E cui sens non es guidaire, No sap ni pot a chap traire, Ans par a la fi bertaus. Et eu que sai sui vengutz, Bos reis, per vostra valor E no.i mou a comtador, M'ais del vers, can er saubutz Vas lo vostr'enter veiaire! Car sai que.ns etz guitz e paire De pretz e tenetz las claus. E creis vos ades vertutz, Cui que.s vir de drech en caire, E Deus, si.lh platz, la.us esclaire! Qu'e.us am servir e non aus |