| prosody | miscellaneous |
Obs m'agra, si m'o consentis La sazos del tems entenerc, Qu'en cal que solatz m'esjauzis! Que contral frech m'agr'obs vestirs E contral tort, qu'eu pren, merces E contral trop tazer chantars E contral chamje dels baros Francs senher e cortes e bos. E jagra plus chald los matis, Si.m sentis mos obs dins l'alberc Que ja forsatz fors no n'issis! Que pena m'es a mans grazirs. E qui soferre s'en pogues, Be fora nauza demandars! E pero, si donars no fos, Ja no saubr'om qui.s fora pros. E plagra mais a mos vezis Manens que paubres!que,pos cerc Totz mos obs, us no m'er tan fis, Pro vetz no l'enoi l'escondirs. E qui trop frez'altruis conres, Sofranhera.lh cals que disnars E, pos s'aficha ses somos, Sembla.lh falha pas e maizos. Be.s pagra genseis, so m'es vis, Enquera sobre son ausberc, S'altra mandaula li falhis, Del seu, que trop n'es bels servirs, E qui.s fai de l'altrui cortes, Pos del seu sera sobravars, Ges no m'es vis aport razos C'a lui repaire.l gazardos. Ges magra forsa l'altrui vis No m'a, s'eu m'oblit ni m'esperc De far aco c'om me grazis. E pero si bels acolhirs No dona pretz mas lui cui es C'aissi com chascus es plus chars, Degra voler que bels ressos Issis ans de lui que de vos. S'om agra- men no m'acolhis, Si.m ponh ni manei ni m'esterc Los jovensels ni.ls enantis, Genser en paregra.l forbirs! Mas qui fara semblan que.lh pes Ensenhamens ni chastiars E vos trebalhatz c'altre fos, Franher i podetz mil bastos Per sagra- men, c'om me plevis, No creiria c'ans tem que.i perc Mos chastics que tos ben assis, Pos trop l'esfreda l'apertirs, Ja colh'ardit, desc'aura mes S'entencion en sos afars! Que, mentre qu'es mancips e tos, L'eschai solatz e pretz e dos. Podagra, don ja no garis, O grans meschaps en pla conderc, Tals qu'el plus lonh adens l'auzis, O fachs don se seg'escharnirs O peitz volria l'avengues Cui jois no platz ni deportars! Que mans pensamens enoios Lonha desse bona chansos. Senher Sobre-Totz, rics pensars E jois e bona sospeissos Cresch'ades Mo-Senhor e vos Qu'eu.m clam enquera dels Navars! Car anc deschauzitz sofrachos Entr'els me fo contrarios |