| |
|||
| prosody | miscellaneous |
Tals gen prezich'e sermona C'a cor fals e maltalen E tals altrui ochaizona Que sa colpa no repren E tals fera peitz de serpen Que so coratg'empreizona, Tals port'umil vestimen C'a volontat felona. Tals l'altrui tort no perdona Que sa part no.n get'al ven E tals molt clam'e tensona Que no n'a drech nien E tals sos fachs fai folamen Que parla gen e razona, Tals semena ben e gen So blat que no.l meissona. Tals a gent'e fort persona C'a sofracha d'ardimen, Tals son amic abandona Que n'a sofracha soven E tals promet que mal aten E tals te pro que pauc dona E tals gran servizi pren Que mal lo gazardona. Tals cud'aver sazo bona A cui en vai malamen, Tals ponh fort et esperona C'a so chaval trop corren E tals cuda far mantenen Que s'a speransa bretona E tals par anar trop len Que sos fachs desazona. Tals quer d'emperi corona Que nostra fe mal defen, E.l pap'entre tertz'e nona S'endorm aissi planamen Qu'encontra sarrazina gen No vei baro que s'opona, Ans an per lor malvolen Qui d'aisso mot lor sona. Jesucristz, per salvar la gen, Portet d'espinas corona, E.l papa so monimen Malamen abandona. L'antecristz, cut, venra breumen, Tan aonda gens felona! Car totztems vei c'om aten La ploia, can fort trona. |