Main PageTroubadours' ListingMore Works by Giraut de Bornelh

The prosody guide is available as a book. Click here for details.

S'anc jorn agui joi ni solatz,
Er sui iratz
E per totztems dezesperatz!
Car m'aventura no.m retrai
Ja cobre jai,
C'ades me desfui e.m trasvai,
Qu'era.m repaira.l consirers,
Que.m fetz ja doler, d'ams ladrers.

Car entr'aspres cre que fui natz
C'a Deu no platz
Que nuls mos bos amics privatz
Viva tan com l'altra gens fai!
Aissi m'eschai
Per mo Linhaure qu'enoi n'ai,
Pos Mos-Jois me falhi primers,
En cui comenset l'encombrers.

Mas era.m alques conortatz
Com om forsatz,
Car vos, Linhaures, m'amavatz!
Mas era.m desconortarai,
Car no.us veirai
Ni ja mais no.m venran de lai
Salutz ni cortes messatgers,
Don jois me sol venir enters.

A bels amics ben ensenhatz,
Nescis als fatz
E drechs e savis als membratz,
Per vos tenh vil abril e mai
E.l dolz tems gai
Ni ja mais no m'alegrarai
Ni no chantarai volonters,
Mas no.us posc be planher esters

A tans bels sabers en portatz,
C'un no.n laissatz
Ja mais vostre pars n'er trobatz
C'anc no vi ni ja no veirai,
Tan non irai,
D'un sol ome tan bel assai
Ni no deu dire chavalers
Que tans en agues olivers

Er'es morta bela foldatz
E jocs de datz
E dos e domneis oblidatz.
Per vos se pert pretz e dechai!
Trol port Velai
Man pro esdevenran savai,
Cui vos fotz guitz e companhers
E melhs apres de bos mesters.

Dels vostres trobars esmeratz,
De las bontatz,
Del pretz, del sen, de las rictatz
En degran esdevenir jai
Celh cui peitz vai.
Ja dels vostres bes no.m gicrai
Que.l bos maestres Berengers
En ressembl'era lauzengers

Ja dizon que per vos s'estrai
Proensa de fachs galaubers,
C'us lai no n'es tan fazenders

Mos Sobre-Totz, si.m fos acers,
Lo cor se.m degra far carters