| |
|||
| prosody | miscellaneous |
Planc e sospir E plor e chan, Mas no m'adui mos chans solatz C'ans, on plus chan, plus sui iratz E.n feblezisc lo cor e.l sen! E cui chans dona marrimen, Que sol lonhar trebalh e malanansa, No.m meravilh si.s vai temen Que.s vir sos sens e sos afars De sordeior semblansa. Qui pot sofrir Ses maltalan, Ja.s sia savis e membratz, Que sai remanon li malvatz Ses aiud'e ses valemen, E.lh franc e.lh cortes e.lh valen, Que fan tirar vas bo pretz la balansa, Moron aissi leugeramen Com es fachs mossenher n'Aimars, Que sera planchs per Fransa E qui sap dir Lo dol ni.l dan, Can bos senher rics ensenhatz Se part dels seus c'a chabdelatz E coltz e noiritz longamen, C'om no l'espera ni l'aten Car qui en cobrar s'agues cal que fizansa, No.i agra tan d'aziramen, Donc es lo drechs e benestars C'om n'ai'ir'e pezansa Pro vetz consir E vauc pensan Com l'estava bela foldatz E pretz e sabers e rictatz Chascuna ses deschauzimen, E de solatz per avinen No posc trobar cui li met'en engansa Ni de man bel ensenhamen, Per que jois falh e gens gabars Merm'er'e dezenansa. A l'acolhir Fora semblan Que.l plus estranhs l'era privatz, Empero be n'aperceubratz La valor en l'acolhimen! E qui.lh parles iradamen, Saupra passar ab fol de mal'esmansa, Si be.l tires, alegramen, Si tot se torn'ir'e tensars Saber en sen d'enfansa. Be.us posc plevir Ses malestan Qu'entre las altas poestatz Era mentagutz e lauzatz Pel pretz e per l'eissernimen E pos ab la menuda gen Saupra grazir onor e benestansa! Als francs parlava franchamen, Si tot s'er'orgolhos e chars Lai on om se bobansa. Re no dezir Saber aitan - Ni no.n seria tan paiatz - Si d'els non era.l plus prezatz Que lor meneron leialmen, Plus francs contra lor falhimen. Qu'en gran afar notz pauc petit'erransa, Qui be s'acuza ni.s repren, Per qu'eu cre que sos tortz l'er pars! En Deu n'ai esperansa. Qu'el denh auzir Cels que.lh querran C'a l'arma do repaus e patz, E.l sanhs vas en qu'el fo pauzatz - Qu'eu.l vi baizar molt umilmen - Li si'en loc de bo guiren C'anc plus pros bars de lui no portet lansa Ni non ac totz comunalmen Los aips ab que.s fassa lauzars Ni per que pretz s'enansa. E Deus, que.l formet de nien, Li don ab sos angels preclars Part de lor benanansa |