Main PageTroubadours' ListingMore Works by Giraut de Bornelh

The prosody guide is available as a book. Click here for details.

Aquest terminis clars e gens,
Qu'es tan deziratz e volgutz,
Deu esser ab joi receubutz
E chascus en sia jauzens,
Car ven estatz
Ab sas clartatz
A cui no platz
Jois ni solatz,
Non es amatz
Ni amaire.

A me melhura mos talens
Pel joi, car issem a la lutz.
Que totz lo deportz e.l desdutz
Conve qu'esta sazo comens.
Pos vei los pratz
E.ls bois folhatz,
Eu volh sapchatz
Per amistatz
Sui envezatz
E chantaire.

Mo cor es plus gais e salhens,
Car m'es us messatgers vengutz
Que.m retrai d'un' amor salutz,
Don me ve jois e jauzimens.
Si.m sui estatz
Lonc tems iratz,
Dezacordatz,
D'amor sebratz,
Er posc assatz
De joi faire.

Molt es grans la proez' e.l sens
Qu' el' a! tan bos sabers adutz
C'anc no fo per leis mentagutz
Orgolhs ni no.lh passet las dens!
C' umilitatz,
Don es chargatz
Sos cors prezatz,
La ten en patz
E.lh ditz: parlatz
E - no gaire

Sobre totz bos ensenhamens,
Aitan fort es sos pretz cregutz,
Es lo seus per melhor tengutz
Ni ja no l'en er fachs contens!
Ans a poiatz
Los aussors gratz
C'als plus senatz
Es, so sapchatz,
Greus la meitatz
A retraire.

Tan es rich' e pros e valens
Cela de cui eu sui rendutz,
Per qu'eu no dei esser crezutz
C'Amors me des tans d'ardimens
Que si fors' atz
De leis privatz,
Vos diriatz
So, s'ab leis jatz,
Qui'i for'onratz
L'emperaire

Domna, mos pens e mos entens
E totz mos respechs e mos cutz
Es en vostra merce chazutz
E prenda.us de me chauzimens!
Qu'eu.m sui d'un latz
Pel col lassatz
A vos donatz
Et autreiatz,
Car tan eratz
De bon aire.

Domna, volhatz
Que mos pensatz
Sia vertatz
E, s'a vos platz
Ma volontatz,
Me n'esclaire.

Domna, si.us platz,
Merce n'aiatz
E no.m fassatz
Lonc mal traire