Main PageTroubadours' ListingMore Works by Guilhem de Montanhagol

The prosody guide is available as a book. Click here for details.

Nulhs hom no val ni deu esser prezatz
S'aitan quan pot en valor non enten!
Qu'om deu valer segon qu'es sa rictatz
O sa vida no-l fai mas aunimen.
Doncs qui ben vol aver valor valen
Ay'en amor son cor e s'esperansa,
Quar amors fai far ricx faitz d'agradansa
E fai home viure adrechamen
E dona joi e tol tot marrimen.

Mas ieu non tenc que si'enamoratz
Cel qu'ad amor vay ab galiamen!
Quar non ama ni deu esser amatz
Hom que sidons prec de nulh falhimen,
Qu'amans non deu voler per nulh talen
Ren qu'a sidons tornes a deshonransa!
Qu'amors non es res mas aysso qu'enansa
So que ama e vol ben lialmen,
E qui-n quier als lo nom d'amor desmen.

Pero anc mi no sobret voluntatz
Tan qu'ieu volgues nulh faich desavinen
De la bella a cui me sui donatz,
Ni tenria nulh plazer per plazen
C'a lieis tornes a negun vilimen,
Ni-m poiria per ren dar benanansa
De ren qu'a lieys tornes a malestansa!
Quar fis amans deu voler per un cen
Mais de sidons que-l sieu enantimen.

Mas amans dreitz non es desmezuratz,
Enans ama amezuradamen!
Car entre-l trop e-l pauc mezura jatz:
Estiers non es mezura, s'o enten,
Anz notz quasqus amans e, quar no i men,
Segur estei e franha fals'usansa
Que-ls fals aman menon la fals'amansa!
E qui dreg sec, Dieus tot ben li cossen,
O tart o temps, sivals al finimen.

Car ges li pro, el temps que n'es passatz,
Non cercavon d'amor mas l'onramen,
E las dompnas en cui era beutatz
Non feiron faich per ren desavinen:
Per so eron elas e elh valen,
Quar quecx sivals entendi'en honransa.
Mas ara es pretz tornatz en balansa,
Que-l amador an autr'entendemen
Don sortz blasmes e dans a manta gen.

Era serai per totz los mais blasmatz
Dels amadors d'aquest castiamen
E per celas on renha falsetatz,
Que an lur cor en so qu'ieu lor defen.
Mas parsoniers es del mal, qui-l consen,
E totz hom bos deu destorbar pezansa
E-l savis deu lo fol tornar d'erransa:
Per qu'ieu chasti cels qu'amon falsamen,
E si peza a lur, a mi es gen.

Als Castellas fai Dieus tant d'onramen
Que totz temps an rei de pretz e d'onransa,
E-l miells del mon, mas er n'an melhoransa
Qu'el es joves de jorns e vielhs de sen,
A cui platz mais donars qu'a sel que pren.