Main PageTroubadours' ListingMore Works by Guilhem de Montanhagol

The prosody guide is available as a book. Click here for details.

Senh'En Sordel, mandamen
Ai del ric comte plasen
Proensal qu'a pretz valen
Que-us deman si-us plairia
Mais, ni-us parria plus gen
Que saubes vostr'amia
Vostre cor, si com l'amatz,
O que vos lo sieu sapchatz,
Si-us am'o etz galiatz.
Cauzetz a vostra guia,
Qu'ieu sai be qual penriatz,
Qui no-us en reprendia.

Montanhagol, per un cen
Me seria plus plazen
Que cilh per qu'ieu muer viven,
Saubes be, on qu'ilh sia,
Mon cor, cuy ten en turmen,
Que s'ieu lo sieu sabia.
Quar si-lh mostrava vertatz
Cum suy per lieys turmentatz,
Penria li-n piatatz,
O totz sos cors seria
Durs cum peira, freitz cum glatz,
Tan que merce n'auria.

Sordel, mais val veramen,
Sapchatz lo cor e-l talen
De lieys qu'amatz finamen,
Si-us am'o si-us gualia.
Quar soven, sotz belh parven
Se rescon gran falsia!
E si-us trobatz enguanatz,
Trop semblaretz forsenatz,
Si pueys amatz desamatz,
Ni seguetz la follia,
Quar, pueys qu'hom ve sas foudatz,
Fols es si no-s chastia.

Montanhagol, yeu no pren
Per lieys lunh galiamen
Cuy am e sierf lialmen,
Si be-l plai que m'aucia,
Per que mon fin cor, qu'ieu-l ren,
Vuelh sapch', on qu'ilh estia,
Quar leu m'er en joy tornatz
Le dols don suy trebalhatz,
Pus sabra sos cors prezatz
Cum languisc nueg e dia,
Ni qu'en lieys cuy suy donatz
Es ma mortz e ma via.

Sordel, yeu tenc a non sen
Qui en autruy chauzimen
Met son fach, qu'adrechamen
Per si faire poiria!
Per qu'ieu tenc a mais valen
Que saubessetz la via
Del cor e totz sos pessatz
De la bella don chantatz,
Que si-lh sap cum la cujatz
Enganar, si-us crezia.
S'es aitals cum la lauzatz,
Foll'er s'en vos se fia.

Pus fi de mi eys prezen,
Montanhagol, franchamen
A lieys que m'a ses conten,
No fuy en ma baylia,
Enans ai estat languen
Fis en sa senhoria!
Don s'era ben acertatz
Sos cors don mieus es greujatz,
Leu seria coronatz
Del joy qu'ueymais deuria
Venir, don suy totz secatz
D'envey'e de feunia.

Sordel, le ricx coms prezatz,
On es fis sabers triatz,
Proensals, jutje, si-l platz,
Esta nostra partia,
Qu'ieu enten qu'hom vius ni natz
Mielhs non la jutjaria.

Quar mos senher es lauzatz,
Pauc duptans e pro duptatz
Per cels cuy es desamatz,
Montanhagols, li sia
Li jutgamens autreyatz,
Tortz o dregz, quals que sia.