prosody | miscellaneous |
Bel m'es quan d'armatz aug refrim De trompas, lai on om s'escrim, E trazon prim L'arquier melhor, Nostri e lor, E vey de senhas bruelha: Adoncx trassalh Cor de vassalh, Tro que sos cors s'erguelha. Coms de Tolza, on plus esprim Los ricx, vos vey de pretz al cim, E vuelh qu'aissi-m Don Dieus s'amor Cum part l'aussor Vostre ricx pretz capduelha! Sol qu'a un talh Qui ara-us falh May ab vos no s'acuelha. La Marcha, Foys e Rodes vim Falhir ades als ops de prim! Per qu'ieu-ls encrim De part honor E de valor, Don quasqus si despuelha, Qu'en talh sonalh An mes batalh Don non tanh pretz los vuelha. Jamais no cug que-s desencrim, Quar trop s'a levat peior crim Que-l de Caym, Hom qui l'amor Del ric senhor De Toloz'era-s tuelha! Quar qui defalh, Ni a senhor falh, Greu er que no s'en duelha. Si-l reys Jacmes, cuy no mentim, Complis so qu'elh e nos plevim, Segon qu'auzim, En gran dolor Foran ab plor Frances, qui qu'o desvuelha! E quar defalh Qu'ades no salh, Totz lo mons lo-n reiruelha. Engles, de flor Faitz capelh o de fuelha. No-us detz trebalh, Neis qui-us assalh, Tro qu'om tot vos o tuelha. |