home page ?


Non an tan dig li primier trobador
Ni fag d'amor,
Lai el temps qu'era guays,
Qu'enquera nos no fassam apres lor
Chans de valor,
Nous, plazens e verais.
Quar dir pot hom so qu'estat dig no sia,
Qu'estiers non es trobaires bos ni fis
Tro fai sos chans guays, nous e gent assis,
Ab noels digz de nova maestria.

Mas en chantan dizo-l comensador
Tant en amor
Que-l nous dirs torn'a fays.
Pero nou es, quan dizo li doctor
So que alhor
Chantan no dis hom mais,
E nou, qui ditz so qu'auzit non avia,
E nou, qu'ieu dic razo qu'om mais no dis,
Qu'amors m'a dat saber, qu'aissi-m noyris,
Que s'om trobat non agues, trobaria.

Be-m platz qu'ieu chan, quan pes la gran honor
Que-m ven d'amor,
E-n fassa ricx essays,
Quar tals recep mon chan e ma lauzor
Que a la flor
De la beutat que nays.
Pero be-us dic que mielhs creire deuria
Que sa beutatz desus del cel partis,
Que tan sembla obra de paradis
Qu'a penas par terrenals sa conhdia.

D'una re fan donas trop gran follor
Quar lor amor
Menan ab tan loncx plays,
Que quascuna, pus ve son amador
Fi ses error,
Falh si l'alonga mais!
Quar hom no viu tan quan faire solia,
Doncx convengra que-l mals costums n'issis
Del trop tarzar, qu'ieu no cre qu'om moris
Tan leu com fai, si d'amor si jauzia.

Trop fai son dan dona que-s do ricor,
Quant hom d'amor
La comet, ni-s n'irays,
Que plus bel li es que sofran preyador
Que si d'alhor
Era-l peccatz savais.
Que tals n'i a, quays qu'om non o creiria,
Ab que fos dig qu'en fan assais fraydis,
Per qu'amors falh entr'elas e vilsis,
Quar tenon mal en car lor carestia.

Ieu am e blan dona on ges non cor
Enjans d'amor,
Per que no m'en biays,
Ni o dey far, qu'om la te per melhor
E per gensor,
Per qu'amors m'i atrays!
Qu'amans es fols quant en bon loc non tria,
Quar qui ama vilmen se eis aunis!
Qu'a las melhors deu hom esser aclis,
Don nais merces, valors e cortezia.

N' Esclarmonda, qui etz vos e Na Guia,
Quascus dels noms d'ambas o devezis:
Que quecx dels noms es tan cars e tan fis,
Qu'om que-l mentau pueys non pren mal lo dia.