Main PageTroubadours' ListingMore Works by Guilhem de Montanhagol

The prosody guide is available as a book. Click here for details.

Non estarai, per ome qe-m casti,
Q'eu no-m do joi, pos amors m'en vol dar,
E, mas gais so de gaia chanson far,
Q'eu jauzisca los fins amans e mi!
Car nos platz jois, can li autre son irat
Per c'a nos son tut jauzimen donat,
Q'estiers no-s deu nuls om d'amor jauzir,
Si ben no-s sap de fallimens chauzir
E-l ben e-l mal mercean non jauzia.

Sabetz per qe tem ar qe vegn'a fi
Amors, don nais pretz e totz benestar
Car li plus ric qe-l degran mercear
Vezem los plus qe-l tornon en decli!
Pero a cels qe-n son aissi lognat
Logna ilh joi, pretz e tota bontat,
E promet lor, si ja-l poira tenir,
Qe non volra de lor nul prec auzir,
Ez eu vuelh ben qe-ls fals trueben bauzia.

Mas d'amor tem qe-l si'a far aissi,
Per malvastat qe vei part pretz prezar,
Com al savi fo ja qe-s saup triar
De la ploia qe-ls autres enfolli,
Per qe lui sol tenio-l fol per fat,
Tro qe viret son sen ab lur foldat
E anet s'en en l'aiga ad enfollir!
C'aitals temps cor qe mals es a falhir,
Q'estiers non vei on pretz trobe gandia.

Per so m'ondra amors per lo plus fi,
Qe vol q'eu chan per los seus alegrar,
Car me conois plus fin ad ops d'amar
E car anc jorn vas lei non y falhi!
Per q'eu li-n ren mil merces de bon grat,
Q'il a mon cor en tal ric loc pausat
C'a mi-n creis jois, can ben pes ni m'albir
Co-s fa midons part la melhor grazir
Ab cuende pretz e mais de senhoria.

Mas eu fatz si com fe-l cers, qe, can vi
L'ombra dels bans en la fon bandejar,
De-s gran erguelh, tro qe pres a gardar
Vas sos secs pes, e non s'amet aissi
Com per los bans, car pario-l delgat!
Pero los pes l'avion restaurat
Tro-l feiron pueys los corns prendr'e aucir!
Q'eu lais per lei qe m'auci de desir
Mans de plazers q'amors d'autra-m daria.

Mas, part l'onor, es grans profegz c'om tri,
Anz c'om del tot se dey'abandonar,
Loc conoissent aut e car, car gardar
Deu ben amans qe foldatz no-l gali.
Mas vos, amors, m'en avetz ben gardat
Qe-m fatz amar lei q'es flors de beutat,
De totz los bes qe dompna fan grazir.
Sabers me falh a-ls sieus grans laus complir,
Mas, s'a lei platz, per tot m'ondri d'amia.

Tant a de sen N'Alcay'e de rictat,
E car li platz car mi vol mantenir,
C'ab lei vuelh far totz temps mos cans grazir
E a midons, cui qe plassa o greu sia.