| prosody | miscellaneous |
Seigne'n Thomas, tan mi plai Lo pretz c'om de vos retrai, E-il honrat fag qe vos faitz lai Vos mi fan tan plazer de zai, Que toz zo q'ieu posc ni qu'eu sai Vos profer et ancara mai, Qe pauc mi senbla zo qu'eu ai Ad honrar vos si com s'eschai, Per qu'eu d'aillors m'en prometrai. E temeria faillir, S'ieu m'enardis de querir Qe-m voillatz per amic tenir! Mas car de tot mon cor dezir Vostres precs per comanz auzir E vos honrar et hobezir, Aisso me-n fai tot enardir Q'om pot ben demandar e dir Lai on hom a-l cor de servir. E certanament vos dic Que ia no-m trobarez tric Ni fals ni fellon ni enic, Anz mi trobarez de cor ric. Qui que l'aia croi ni mendic, Et auria-m per enemic Qui-us fezes enoi ni destric, Ni-m creiria d'aisso chastic, Qu'aissi deu hom amar amic. E pos sui asseguratz A demandar zo que-m platz, Prec que cobleian respondatz Ad aquestas coblas qu'eu fatz Per fermar nostras amistatz! Mas eu non quier ges qe-m digatz Si-us es gais ni enamoratz Qu'aisso sai eu ben qu'es vertaz! Qu'estiers non foratz tan prezatz. Pero, si-us ven a plazer, Del vostre noble saber Voill per vos auzir e saber Quar molt en poirai mais valer, Mas trop plus voluntiers vezer Vos volgr'ieu, zo sapchatz en ver, Mas quecs deu laissar remaner Zo que vol, cant no-l pot aver, Tro qe n'ai'autra vez lezer. En Thomas, cel qui-us fai valer Vos don complir vostre plazer, E a mi don sen e poder D'onrar vos que-i ai lo voler. |