| |
|||
| prosody | miscellaneous |
Eu non chant ges per talan de chantar! Mas si chant eu, non chant, mas chantan plor, Per c'aital chan deu hom clamar chan-plor, Car es mesclatz lo chanz ab lo plorar! E no-n dig'om qu'eu aia fait faillenza D'aital mesclar, car so qu'eu dic ploran Non poiri'hom soffrir d'auzir ses chan, Tant es mortals la perd'e-l meschaenza. Car morta es cella qu'era ses par De pretz prezat e de valen valor, De cortes ditz e de faitz e d'onor, D'enseingnamen, d'acuillir e d'onrar, Na Berlenda, domna de conoissenza, Per cui devon plorar li pauc e-ill gran, Car il era de toz faiz benestan Cim'e raditz, flors e frutz e semenza. Mort es tot zo qu'el mon era de car, E zo per qe valion li meillor, E zo per que chantavon chatador, E zo per que prezavon domneiar, E zo per que valia neis valenza, E zo per que estava autr'enan! Plor doncs cascuns, que passat son mil an Que morz no fes tan gran desconoissenza. Om non la vi ni non l'auzi nomnar, Qe non la fes sa domn'e son seingnor, Car fazia ab gaug et ab douzor Los crois valer e-ls valenz afinar. E doncs per que no mor tota-il Proenza Ont il mori, e tuit cil que-i istan C'oimais en dol et en consir viuran, E zo li er piegz de mort, a ma parvenza. Pero sivals hom non la pot comtar Senes son ops, mas a nostra dolor, Car un comtatz non l'era pron d'onor, Per que lla vol Dieus en cel far regnar! E si tot sai en reman dechaenza, Li saint angel la-n portaran chantan Per son profeg, si tot nos torn'a dan: No-s deu adur de plorar estenenza. Luresana, pensatz de penedenza, Que Dieus vos vol confondre derenan, E pareis ben al sobremortal dan C'aves aut, que vostra mortz comenza. |