Main PageTroubadours' ListingMore Works by Lanfranc Cigala

The prosody guide is available as a book. Click here for details.

Un avinen ris vi l'autrier
Issir d'una boca rizen!
E car anc ris tant plazentier
Non vi, n'ai al cor ioi plazen.
Pero fols sui de l'alegrier
Qui-m ten tant alegr'e iauzen,
Que, quant sui en consirier,
E consiran trai tal tormen
Don cug languir de desirier,
Qu'autre ioi non desir ni quier
Et aquel cug qu'aurai trop len.

Miels pogr'om garir d'un archier
Que sagites tan duramen
Que trasspasses l'ausberc doblier,
Que del sieu dobl'esgard pongnen,
C'ab l'un dels oils primeiran fier
Et ab l'autre oil vai feren!
Pois fai un gai rizet derrier,
Ab que me fier derreiramen!
Et intra se-n per l'oil primier,
Mas pero car l'oils no-l sofier,
Vai al cor afortidamen.

Quan fon e mon fin cor intratz
Dedinz lo bels ris e l'esgart,
Mos cors se-n venc tost e vivatz
Vas me claman: merce, qu'eu art
Ades siatz enamoratz
De l'amoros cors, cui Dieus gart,
Qu'a me, qi sui vostre cor, platz.
Tan vei plazen son cors gaillart,
En cui es conplida beutatz
C'abellis a totz los prezatz,
Dels crois si loingna e-s depart.

S'ieu trobes qui li fos privatz,
Qui privadamen da ma part
Portes salutz et amistatz
A leis, don ma salutz no-s part,
Tan li en trametrai, sapiatz,
Que s'ela-m tramezes lo quart
Eu mi baingner'ab gran solatz
En baing de salutz ses regart!
E pos tant me sui azautatz,
S'azautz iois me-n es destinatz,
Per merce la prec no-l m'atart.

A mos iorns non cugiei vecer
Que ris, que par naisser ab iai,
Agues tan afortit poder
Qu'el pogues engenrar esmai!
Anz en degran naisser plazer
Plazen del bel ris qu'eu vi lai!
Pero mon cor me-n fai doler
Doloiros pensamenz qu'eu n'ai.
Mas no son tant li desplazer
Desplazen que-m cailla temer
Qu'eu moria, enanz en viurai.

Pero si-m cug eu tant valer,
Si valors nuls hom'enanz trai,
Qu'eu n'aurai complit mon voler,
Si sa volontaz no-l m'estrai.
E si-m volgues dreg mantener,
Pois sa mantenensa mi plai,
De midonz mi degr'eschazer
Tot so qu'a fin aman eschai.
Pero eu no-il quier son aver
Mas la ren que-il sabrai querer,
Si m'o dona, ben o penrai.