prosody | miscellaneous |
Car es tant conoissenz, vos voil, Segne'n Lafranc, qerer d'amor! Q'ie-n voil appenr'et ai paor Non trassaillis als prims essais. Qal prezatz mais, O valen domna conqerer Per gran saber, O qe proeza vos enanz Tant qe de leis sias ioios Simon, non sui tals con ieu soil, Quar ieu cuiei ia per error Qe sabers guides l'amador! Mais ar d'aqel cuiar mi lais, Qar amor pais Iois, on granz senz non pot caber: C'ab franc voler D'ardit cor vai amors enantz E grantz senz l'es contrarios. De vostre conseil mi destoil, Segne'n Lafranc, ia mais no-i cor: Qar vos laissatz sen per follor E de folli'ardimenz nais Ab granz eslais, Donc pos follatges n'a-l poder! Grieu pot valer Nuls hom ni far bels faigz prezanz, Si no-l guida senz o razos. Folia no-m platz ni l'acoil! Ia no-m dones aital color. Mas granz senz no m'a tal sabor En amar, car mais i val iais. Ni non retrais Qe-m vengues foudatz a plazer! Anz dic per ver, Tot zo non es ges foudatz granz, Qe non es senz als amoros. Segne'n Lafranc, d'amor mi doil, E n'ai pensamen e dolor E non puesc venzer per ricor Ni per ardimen tant gran fais! Anz creis l'esmais, Qi-m fa qada dia doler! E-m desesper, Per qe se-l senz no m'es garantz Qi-m guide, morrai ad estros. Amors vol qe cors d'amic broil De ioi, de pretz e de valor E de bel solatz chascun ior, E granz sens l'es dols e pantais! E se-n irais, Donc si-us deu senz d'amor valer. Al mieu parer, Partretz vos en per sos comanz, Per q'es granz senz meinz saboros. Na Flors-de-lis pretz e saber Ten en poder! Iutge, si-l platz, deserenanz, E Iacme Grils q'es gais e pros. Symon, ab mi si deu tener, Al mieu parer, Na Flors, e s'il n'es accordantz, No-m chal s'en Iacmes ten ab vos. |