Bel m'es quan la rana chanta
E.l sucs pueja per la rusca,
Per que.l flors e.l fueilhs e.l busca
E.l frugz reviu en la planta,
E.l rossinhols crid'e brama
Sa par qu'a per joi conquisa,
Ples d'orgueilh car el no sen
Freg ni gel ni glaz ni bisa.

Non aus so que m'atalanta
Dir d'una gen que.s fa cusca,
Cui Malvestatz franh e frusca!
Qu'entre mil no.n trueb quaranta
De cells cui Proeza ama.
Qu'en un castell l'an assiza
E trazon i ben ab cen
Peiriers cill qui l'an revisa.

Pres es lo castells e.l sala,
Mas qu'en la tor es l'artilla
On Jois e Jovens e silla
Son jutjat a pena mala!
Qu'usquecs crida fuec e flama
Via dinz e sia prisa
Degolem Joi e Joven
E Proeza si' aucisa.

Senher, ben hi a gran tala
Si mor ses fill o ses filha
Retengam per meravilha
Lo bec o l'ongl' o l'ala,
Quar de pauc albr' eis grantz rama
Quan bona pugn' i es misa,
Per qu'ieu n'esper e n'aten
Lo frut aprop la semisa.

Non vueilh far paraula lonja:
Preza es la francha causa
E non troba fin ni pauza
Si no.s met reclus' o monja,
E pos chascus la derama
E las denz li franh e brisa,
Leu non i trueb mas paren
De Portogal tro en Friza.

Duc e rei senes messonja
Ll'an primier la boca clausa,
Qu'ill fan de pauc fag gran nauza
Quar Donars lur fai vergonha!
Tan tem quecs que falha trama
Per qu'en lur cortz non es visa
Copa ni enaps d'argent,
Mantells vairs ni pena griza.

Maritz qui l'autrui con grata
Ben pot saber que.l sieus pescha
E mostra com hom li mescha,
Qu'ab eis lo sieu fust lo bata,
Et aura.n tort si s'en clama,
Car drech e racos deviza
Que qui car compra car ven,
Ar, segon la lei de Piza.

D'aqui nais l'avols barata,
Ric cui mortz e Dieus descresca
Qu'us non fai condug ni tresca!
Non sia lauzenja plata
Cell qui sa maisnad' afama!
Cest vest la blancha camiza
E fai son seinhor sufren
E ten si dons a sa guiza.

Alegretz, folls, en qual quiza
Cujas far d'avol valen
Ni de gonella camiza
Antz co.s pot levan cazen
Qual gonella qual camiza.