D'aisso laus Dieu
E saint Andrieu
C'om non es de major albir
Qu'ieu sui, so.m cuig,
E no.n fatz bruig
E volrai vos lo per que dir.

C'assatz es lait,
S'intratz en plait
Don non sabretz a lutz issir!
E non es bo
Digatz razo
Si non la sabetz defenir.

De gignos sens
Sui si manens
Que mout sui greus ad escarnir,
Lo pan del fol
Caudet e mol
Manduc e lais lo mieu frezir.

Tant quant li dur,
Li pliu e.il jur
C'om no.m puosca de lui partir!
E quan li faill
Mus e badaill
E prenda del mieu lo dezir...

Qu'ieu jutg'a drei
Que fols follei
E'l savis si gart al partir!
Qu'a dobl'es fatz
E dessenatz
Qui.s laiss'a fol enfolletir.

D'estoc breto
Ni de basto
No sab om plus ni d'escrimir!
Qu'ieu fier autrui
E.m gart de lui
E no.is sap del mieu colp cobrir.

En l'autrui broill
Chatz cora.m voill
E.i fatz mos dos canetz glatir!
E.l tertz s'ahus
Eis de rahus
Bautz et aficatz per ferir.

Mos alos es
En tal deves
Res mas ieu non s'en pot jauzir,
Aissi l'ai claus
De pens navaus
Que nuills no lo.m pot envazir.

De pluzors sens
Sui ples e prens
De cent colors per mieills chauzir!
Fog porti sai
Et aigua lai,
Ab que sai la flam' escantir.

Cascuns si gart,
C'ab aital art
M'er a viure o a morir!
Qu'ieu sui l'auzels
C'als estornels
Fatz los mieus auzellos noirir.