Dirai vos en mon lati
De so qu'ieu vei e que vi!
Non cuich que.l segles dur gaire
Segon qu'escriptura di,
Qu'eras faill lo fills al paire
E.l pair' al fill atressi.

Desviatz de son cami
Jovens se torn' a decli,
E Donars qu'era sos fraire,
Va s'en fugen a tapi,
C'anc dons Costans l'enganaire
Joi ni Joven non jauzi.

Soven de pan e de vi
Noiris rics hom mal vezi,
E si.l tengues de mal aire
Segurs es de mal maiti,
Si no.i ment lo gazaignaire
Don lo reproviers issi.

Lo mouniers jutg'al moli:
Qui ben lia ben desli!
E.l vilans ditz tras l'araire:
Bons fruitz eis de bon jardi,
Et avols fills d'avol maire
E d'avol caval rossi.

Eras naisson dui poilli
Beill, burden, ab saura cri
Que.is van volven de blanc vaire
E fan semblan aseni!
Jois e Jovens n'es trichaire
E malvestatz eis d'aqui.

Moillerat, ab sen cabri,
Atal paratz lo coissi
Don lo cons esdeven laire!
Que tals ditz : mos fills me ri
Que anc ren no.i ac a faire:
Gardatz sen ben bedoi.

Re no.m val s'ieu los chasti,
C'ades retornan aqui,
E puois un non vei estraire
Marcabrus d'aquel trahi,
An lo tondres contra.l raire,
Moillerat, del joc coni.

An lo tondres contra.l raire,
Moillerat, del joc coni.