Bel m'es quan la fuelh' ufana
En l'auta branquilha
E.l rossinholets s'afana
Desotz la ramilha
Que.l platz frims, a la luguana,
Del chant que grezilha.

Quecx auzels quez a votz sana
De chantar s'atilha,
E s'esforsa si la rana
Lonc la fontanilha,
E.l chauans ab sa chauana,
S'als non pot, grondilha.

Sesta creatura vana
D'amor s'aparilha,
Lur joys sec la via plana
E.l nostre bruzilha!
Quar nos, qui plus pot enguana,
Per qu'usquecx buzilha.

Volpils lengua traversana
Qu'a lairo cossilha,
Ab sa messorgua baussana
Desert' ez essilha,
So per qu'amor segurana
Non truep ses ruylha.

Jovens feuney' e trefana
E Donars becilha,
Saubud' es causa certana
Que Valors guancilha,
E Maluestatz va sobrana
La mair' e la filha.

Pieger es que gualiana
Amors que guespilha,
Cruzels cozens e baiana
Calens e frezilha
Quar molt tratz mal e safrana
Selhuy cui estrilha.

Sist falsa gent crestiana
Qu'en crim pec fremilha,
A la fi ves Corrossana
Vira l'escobilha,
Que.l baptismes de Jordana
Lur notz e.ls perilha.