Emperaire per vostre prez
E per la proeza q'avez
Sui a vos venguz, zo sabez,
E no m'en dei ges penedir.

Meillz m'en degra lo pels sezer
Car chai vinc vostra cort vezer,
Q'eu farai loing e pres saber
Lo joi que vos es a venir.

S'anc per vos demenei orgoill
Tot m'es tornat en autre fuoill,
Qe tals mena bon fait en l'uoill
Qe no s'en auza descobrir.

Qi.l sap bon q'eu sui tant poinenz
Als malvats et als recredenz,
Per qe n'a serradas las denz
E non ausa lo criz eissir

Emperaire, si ben enquers,
Lo reprovers es fis e mers:
Co qe dons dona e plora sers
Las lacrimas devon perir.

S'eu me faill al vostre donar
Jamais a gorc qu'auza lauzar
Non ira Marcabruns pescar
C'ades cuidaria faillir.

Per aqella fe q'eu vos dei,
Anc mes emperador ni rei
Non agron tal merchat de mei,
Con vos, e Dieus m'en lais jauzir.

Emperairiz, pregaz per mei,
Qu'eu farai vostre prez richir.