Al departir del brau tempier,
Quan per la branca pueja.l sucs
Don reviu la genest'e.l brucx
E floreysson li presseguier
E la rana chant' el vivier
E brota.l sauzes e.l saucx,
Contra.l termini qu'es yssucs
Suy d'un vers far en cossirier.

Cossiros suy d'un gran vergier
Ont a de belhs plansos mans lucs!
Gent sont l'empeut e.l frugs bacucs,
Selh qu'esser degran sordegier,
Fuelhs e flors paron de pomier,
Son al fruchar sautz'e saucs,
E pus lo caps es badalucs,
Dolens son li membr' estremier.

Mortz son li bon arbre primier,
E.ls vius son ramils e festucs,
Dels fortz assays los vey damnucx,
Mas de bordir son fazendiers,
De promessas son bobansiers,
Al rendre sauzes e saucx,
Don los claman flacs e baudux
Ieu e tug l'autre soudadier.

Quan son la nueg josta.l foguier
N'Esteves, en Constans, en Ucs
. . . . . . . . . . . .
Mais que Berartz de Monleydier!
Tota nueg joston a doblier,
El jorn a l'ombra dels saucx
Auziriatz nausas e bauducx
E doblar entr'els l'escaquiers.

Doncx no pairejon li derrier!
En totz bos sens ab los faducs,
E log si Cozer' e Sarlux
Valon Toloz' e Monpeslier
Qu'ieu sai quals mortz foron primier
E.l mais dels vius son vers saucx,
E podetz dir qu'es benastrucx
Qui troba laur ni olivier.

Neys l'ortolas ab lo clavier,
Jos ab un vent, s'en fuy huelhs cucx,
Per esclavina e per trabucx
An laissat mantelh e caussier.
Ni ren non ai del estagier.
Tal hira.m fan sautz' e saucx!
Si no.ls ten reys o coms o ducx
Totz temps seran mais caminier.

Los pros sal Dieus qu'an pretz entier,
Que.ls rics malvatz paron saucx,
Per que.l segles es badalucx,
Don malavey'e desturbier.