Seigner n'Audric,
Al vostr' afic
Mout etz d'aver secos e plans,
Puois so dizetz
Que no.n avetz,
Qu'en setembre vos faill lo grans.

Lai, ves Nadal
Tot atretal
Vos faill la carns e.l vins e.l pans
Et en Pascor,
Seguon l'auctor,
Crezetz en l'agur dels albans.

S'a destre vai,
Conosc e sai,
Qu'etz de bon ostal segurans,
Si l'agurs faill
Venon badaill,
Et es blasmatz sains Julians.

Totz vostres us
Sap Marcabrus,
E totz vostre meiller bians
Del ventr' emplir,
E d'escarnir
Es, e de cossentir putans.

Quan vos totz sols
Etz ben sadols,
Non vos es ges rics gaps loindans!
Segon tas leis
As plus conqueis
Que non fetz Cesar als Romans.

De lengueiar
Contra joglar
Etz plus afilatz que milans!
Del vostre bec,
N'Artimalec,
No.is jauzira ja crestians.